Manipur-i Senior Women’s Football Nationals 18 ben buba kokogo

Jalandhar, June 06 (Agencies): Hombarnü Punjab, Jalandhar nung senior women’s National Football Championship final asaya nung Manipur-i otsü tasen ka yanglua Railway kokogo. Parnok tang agi iba asayamong 18ben buba akoker.
Iba asaya nung Manipur tsürtem atema Ng Bala-i goal ana aser Dangmei Grace-i goal ka agüja 22buba State Senior Women’s National Football Championship 3-1 agi Railways Sports Promotion Board madak takok angu.
Ng Bala-i Odisha den semifinal asayaba mapang goal idaktsüba yimya mesamai maneni final asaya nunga goal agüja liasü. Lai Odisha den asayadanga asaya tanabuba shilem tetenzüklen goal agüja tenzük. Ajisüaka Hombarnü final asaya nungbo lai asaya tenzüker minute 21 buba nung goal agütsü. Asaya tanabuba shilem nung minute 6 shi or Railway telok nungi Kabita-i goal ka agüja score 1-1 ta aküm saka Manipur tsürtem parnok asoshi kanga dang tashi tait liasü. Railway telok nunga Manipur tsürtem 6 lir aser parnok asembo iba asaya nung shilem agia liasü.
Asaya nung maneni Railway puri goal agütsüba sülen minute 2 dang lir Dangmei Grace-i Manipur pur atema goal tanabuba agütsü aser iba sülen minute 81 buba nung Ng Bala la asoshi tanabuba aser par telok asoshi tasembuba ta goal ka agüja parnoki iba asayamong akok.
Iba asayamong ya 1991-92 nung mezüngbuba Imphal nung asayaa tenzük aser tang tashi nung 2013-14 Bhilai (Chhatisgarh) nung asayadang dang Manipur tsürtem final metongteti lir.
Senior Women’s National Football Championships asayaba nung Manipur tsürtem pezüben dang tamakok ngua lir.