Manipur-i sepai 4,000 yokogo; UNC-i President’s Rule akhanger

New Delhi, December 20 (Agencies) : Manipur nung National Highways nokdangba sülen tensa mejungi akümba azüoktsü atema Centre-i paramilitary personnel 4,000 yokogo.
Taoba anogo ana tsüngda paramilitary personnel 1,500 shi Manipur-i arsanga yok aser taoba hopta paramilitary 2,500 shi yoka liasü, ta Home Ministry ketdangser kati ashi.
November 1, 2016 nungi United Naga Council-i National Highways ana nung ‘economic blockade’ tenzükba sülen Manipur nung tensa mejungi akümba asoshi khuret bena sepaitem yok, ta ketdangseri ashi.
UNC-i NH-2 (Imphal-Dimapur) aser NH 37 (Imphal-Jiribam) nokdanger lungkak aiter aser iba lenmang ana ya Manipur asoshi tongtipangtiba lenmangtem lir.
Deobarnü nisung telok kati Imphal-Ukhrul lenmang nung gari 22 rongdoktsüba aser raksatsüba sülen Imphal East district nung mapang telatetba makai curfew ozüng agütsü aser ano Imphal West district nunga nikongtsütsü nungi anepdang tashi curfew alitsü tetuyuba agütsüogo.
Nagaland Chief Minister, T.R Zeliang-i Centre aser Manipur sorkartem dang Manipur kübok Imphal lenden nung aliba Naga nunger taküm aser kiojentem kümzüktsü atema mapa inyaktsü asüngdangogo.
T.R. Zeliang-isa Union Home Minister Rajnath Singh aser Manipur Chief Minister Ibobi Singh na dang Imphal nung Naga nunger noklang aika pei pei yimtsüngi moudaktsüi sota ayuba indang khuret metetdakja liasü.
Mongulbarnü United Naga Council-i New Delhi nung Home Minister Rajnath Singh den ajurutepa Manipur nung President’s Rule alitsü takhangba agütsü. Parnoki Bodbarnü Tir Pranab Mukherjee den ajuruteptsü.
Manipur nung district tasen 7 tentetbaji ozüng alema inyakba mapa lir, kechiyong Hill Area Committee den masüngdangtepi iba telemtetba agi ta UNC-i aitsür.
“State sorkari Naga nunger den asüngdangya mesüi district temji Naga district tem lemdanger tentet. Iba ya 2011 küm Ministry of Home Affairs-i tezüluba ka nung nangzükba anema inyakba mapa lir” ta taoba UNC president, K.S. Paul-i ashi.
“Onoki Home Minister ajuruogo aser pa dang mapa inyaktsü asüngdangogo. Naga nungertem lushi lemdangba aser district tasen tentetba onoki magizüker. Onoki Manipur nung President’s Rule alitsü akhanger” ta pai ashi.
“State sorkari iba mapa inyakba ya yimtenren tsütsü ajangzüktsü asoshi inyakba lir. Naga nunger aser lushiji bendangtsü makok” ta taoba UNC president, L. Adani-isa osangbener dang ashi.