Manipur: ‘Iron Lady’ Irom Sharmila kibong kümogo

Imphal August 17 (Agencies): Special Marriage Act kübok Sub-Registrar office nung tanep Manipur civil rights activist Irom Sharmila aser British nunger Desmond Coutinho na kibong kümogo. Iba kibong akümba sentong ya Sub-Registrar Radhakrishnan matsüngdang agi aser Coutinho-i Sharmila meyong nung kuri inoktsü.
Iba kibong akümba benjungmong ya kanga dang tongmelang liasü aser tena prongla kinungertem iba sentong nung maden. Taoba mapang nung tena Hindu Marriage Act kübok kibong aküm aser iba kibong kümba ya tamangba yimsü balala ana tsüngda asünung Sub-Registrar-i tena dang Special Marriage Act kübok züngoksemtsü asoshi asüngdanga liasü. Sharmila-i ashiba agi Kodaikanal ya kanga dang tesenep aser yimjung aliba tesem ka lir aser pa yimjung bushiba iba nung ya tembangogo. Lai ashiba agi, Kodaikanal nung tribal tem ajungkettsü atema lai inyaktsü.
Iba kibong akümtsüba sentong ya local activist V Mahendran-i anema liasü, pai ashiba agi, tena iba tesem nung lira tribal tem temzüng ozüng tsütsü tebilemtsü ajurutsü.
Ajisüaka sub-registrar-i iba ken o ya magizük aser Sharmila, Coutinho den kibong akümtsü asoshi temelaba agütsü. Tanati Special Marriage Act kübok kibong akümtsü atema July 12 nü application agütsü aser iba sülen Sub-Registrar-i anogo 30 tsüngda nung tashishitsükar lira ashishitsü asoshi mapang lapoktsü.
Iba tesem nung aliba tribal, Palani Malai Pulaiyan aser Paliyar nunger dena parnok kari Sharmila o Coutinho na kibong akümtsüba pusema Sub- Registrar nem tezüluba nung shidi ka agütsü.
‘People’s Resurgence and Justice Alliance’ nungi Manipur Assembly election nung March ita tamakok anguba sülen Sharmila, Coutinho den iba tesem yagi ao. Arishi küm 44 tain activist ya Armed Forces (Special Powers) Act, 1958 Manipur nungi aginang ta November 4, 2000 nungi tenzüka lumia longkak aitba ajanga nüngtugu aküm.
Sharmila dang ya ‘Iron Lady’ taa ajar aser la küm 16 tashi lumiba sülen August 9, 2016 küm iba lumiba tembanga AFSPA anema nokdaktsü asoshi la chief minister kümner ta sangdonga liasü.