Manipur jang ajanga cancer tashidak ajunger

Black RiceOctober 29, 2015 (TYO): American Chemical Society-i ajanga ashiba agi, jang tanak ya kang dang teyari aketba aser jenjang temela chiyungtsü lir. Iba jang yagi alima nung aliba nisung asemsü nungi shilem kabo chiyungshitsü ta asadangtetogo.
Pei lu nungi tang tensa nung nüngdakba chiyungtsü adokdaktsüsü asoshi tejangraba tulu nung Manipur nunger kanga dang shisa taka aluyimer Devakanta-i ‘eco friendly’ inyakyim ajanga küm shia tsünütsü balala anepaluyim nguteta lir.
State nung alu nungi adokba ajanga noklang nung shilem 70 shi mesür aser iba jagi India industry kanga nungiter. State nung chiyungba dang masü saka manipur nungi linük asoshi chiyungtsü noklang nung shilem 1.5 adoker.
Devakanta-i tangar dang nungi balaka bilemdangba ajanga pai ayimba ‘organic farm’ nungi cancer anepdaktsüba jang tanak (black rice) koba dang ‘chakhao poireiton’ ta ajar, iba jang den ano tzü agi anüngba mapang adokba tsünütsü aika tsünüteter.
India ya jang timba adokdaktsür linük ka lir ajisüaka linük nung jang tapu balala kwi adoker ibaji masadanger.
Manipur nung jang tapu aika adoker aser item jangji tanga state nunga tsünütettsü. Aluyimertemi chakhao poireiton dena jang tanak tapu 20 tsüner aser ajakji kanga dang teyari aketba jangtem lir.
BLACK RICE: ORGANIC ANTIBIOTIC
Manipur ya ‘chakhao poireiton’ tsünüba nung kanga nüngtugu lir. Iba jang nung iron aser amino acids ket lir. Iba den külemi ‘chakhao poireiton’ nung blueberries dak aliba anthorcyanin antioxidant keta lir aser iba jagi cancer tashidak den rarateter. Anthorcyanin antioxidant ya ‘anti-cancer compound’ ama amshir.
Iba jang ya Indonesia, Philippines aser China linüktem nunga kanga nüngtugu süa amshir. Parnoki iba jang ya rice cakes mesüra noodles yangluba nung kanga amshir. Küm noklang aika tejaklen China nung iba jang ya chubatem dak alaka tilartem nembo mechiyungdaktsü.
Devakanta ya farm 200 tashi yima lir aser pai chakhao poireiton züindaktsütsü asoshi kanga meranga inyaker. Pa meranga inyakba ngua state nung aliba nüburtemia iba jang tsünütsü tenzükogo.
Dr Anjali Pathak-i, “Kü dangi arur cancer agi shirangertem dang ni ‘chakhao poireiton’ chiyungtsü ashir kechiba süra sen tasak agi mozü tesashi alia chir tesülen temang nung timtem adokba dang nungibo iba jang ajanga teyari tuluba agütsür. Jang tanak, ayurvedic mozü aser organic chiyutsütem ajanga cancer meshishia jungdaktsür,” ta ashi.
Jang tanak yagi viral fever, yimra aser temulungjang tashidak nung yariba den temang nung cholesterol level ajemdaktsü aser blood pressure azüoker.
Iba jang ya e-commerce website kar ajanga seret nung sen 300-350 tashi agi yokdar. Iba jang dak teyari aliba angateta sorkari acha ayanga teinyaktsü kar inyaktsü nüngdaker.

You must be logged in to post a comment Login