Manipur ‘Khongjom Day’ nung Tir adentsü

New Delhi, April 22 (Agencies): Honibarnü Tir, Pranab Mukherjee-i Manipur semdanga ‘Khongjom Day’ sentong nung adentsü aser Khongjam nung Monument-cum-Tourist Centre lapoktsütsü.
Manipur sorkari pei tetsü tasoli atema taküm bendanga agütsürtem nem tetushi agütsütsü atema kümshia April 23 nü Khongjom Day amunger.
Imphal nungi kilometer 36 pilar Indo-Myanmar nung aliba Khongjom War Memorial ya puti otsü tongtibang tesem ka lir. War memorial ya tamalen yanglua aliba raksar yanglushi, aser memorial tasenbaji Tir, Pranab Mukherjee-i lapoktsütsü.
1891 küm iba tesem nung Manipur nungi nokinketer rongnung densema alisang, Major General Paona Brajabashi-i British nunger sepaitem den raratepa liasü.
SPG aser security ketdangsertem Manipur tonga arua yimti tesemtem aser Thoubal district nung security akangshia tensa mita reprangdar.
Tir nikongdang tonga aruba sülen IAF helicopter ajanga sentong aliba tesemi aotsü. Security sepaitemi iba tesemji kanga junga mittsü, kechiyong telungpur teloktemi Tir, Ato kilonser aser Central minister tem nokdanger.
Taoba mapang Tir, V V Giri-i 1972 küm October 21 nü Memorial Khongjom War monument ya lapokja liasü, aser iba mapang nungi tenzüka 1891 küm Anglo Manipur rara nung asürtem nem küm shia akhüm tetushi agüja arur.
1891 küm Manipur amakba atema British nunger ketdangser pongu tepsetba sülen British nungeri Manipur anema rara sangdonga tesem asem nungi Manipur amak, aser iba raraji alima nung azü jenti tokshia raraba tongbang rongnung ka liasü.