Manipur kübok district 4 nung tensa azüokogo: Indian Army

Imphal, May 5, 2023 (Agencies): Manipur kübok Churachandpur, Kangpokpi, Moreh aser Kakching nung tensa azüokogo ta Indian Army indang Spear Corps (III Corps) ajanga metetdaktsü.

“Mapang shitak nung mapa inyakba ajanga tensa azüokogo aser yasüng nungi ozüng alema inyakba tatalokba kecha mali” ta Spear Corps-i ashi.

Tesüiba ghonda 12 tsüngda Imphal East aserr West district tem mi senoktsüba aser mokdang ayongtsü merangba atalokogo ta Indian Army-isa ashi.

Tang tashi nung civilians 13000 tashi kümzükogo aser parnok khen atema military premises nung anenzükdakja lir, ta parnokisa metetdaktsü.

Hokolbarnü nisung telok kati MLA Vungzagin Valte amakdang pa yirua mozü kidang anepaludar saka pa temang tajungba kümogo.

Manipur director general of police (DGP) P Doungel-i nübortem dang süngjema alitsü aser tensa meraksatsü mepishia metetdaktsüogo.

“Nübortemi police aser sorkari mepishiba tashi angatsüla kechiyong Army indang inyakyim balaka lir. Army-i police ama meinyaker. Army-i tsükchirtem den raratsü atema training agir saka police-ibo nübortem azüoktsü atema training agir” ta DGP P Doungel-i ashi.