Manipur lanur nem Congress-i mapa 50,000 agütsütsü, tetsür nem mapa 33% lemzüktsütsü

Imphal, February 4, 2022 (Agencies): Congress-i Hokolbarnü Manipur Assembly election atema manifesto sayaba nung küm shia lanur nem mapa tasen 50,000 adoktsütsü, sorkar mapa ajak nung tetsür nem shilem 33 lemzüktsütsü aser Armed Forces Special Powers Act (AFSPA) agientsü nangzükogo.

Congress MP Jairam Ramesh, Bhakta Charan Das, taoba Chief Minister Okram Ibobi Singh aser state lennirtem lia Congress indang manifesto saya.

“Nagpur nunger masü saka Manipuri nungeri Manipur len anitsüla. Manipur ya Nagpur nungi masü saka state nungi dang yimsü asütsüla” ta MP Jairam Ramesh-i ashi.

BJP sorkar ajanga Manipur tejakleni moudaktsür saka iba manifesto ajanga Manipur terenlokleni anir aotsü, ta paisa ashi.

“March 10 nü Manipur nungeri obendang agütsütsü. Taoba küm 5 tashi state tammang nung lia aruba agientsü aser INC-i Manipur tarutsü len anitsü onoki amanger” ta MP Ramesh-isa metetdaktsü.

“BJP-ibo tebang agi jembiba ama masü saka Congress party-ibo manifesto ya kanga dang temeshi kulikaket ka ama züngshir” ta taoba CM Ibobi Singh-i ashi.

Prime Minister dennür BJP-i parnoki nangzükba nungi shilem 20 tashii meinyaktsü” ta paisa ashi.

Congress indang manifesto nungsa kümshia Manipur-i tourist million tesadang ka anir arutsüba, state nung tsünütetba jang agi state peritsü, tim mesüi puoka aliba media nisungtem nem teyari agütsütsü, Manipur telongjem aser maitsü wazüka ayutsü, hill districts nung alirtem atema mountain economy tenzüktsü aser kechisarena nung jenjang atuba azüoktsü atema diesel aser petrol nung value-added tax jenjang azüoktsü onüktem shia lir.