Manipur lennirtemi Rahul Gandhi den Naga accord lemsatep

Imphal, December 19 (Agencies): Manipur nungi tongtipang telok asemi Hombarnü Congress tir Rahul Gandhi den ajurutepa NSCN(IM)-Centre yimjung maparen dak sendakba onüktem lemsatep.
United Committee Manipur (UCM), All Manipur United Clubs’ Organisation (Amuco) aser Committee of Civil Societies, Kangleipak (CCSK) nungi lennirtemi Rahul dang Naga telungpur tebilemtsü ajanga Manipur state nung timtem ajurutsü akok ta ashi.
Parnokisa Rahul nem parnok takhangbatem tezüluba nung agütsü.
August, 2015 nung Centre aser NSCN(I-M) tsüngda ‘Framework Agreement’ agiba ajanga Manipur nung telongjem aser litsü nung mekongshitsüla, ta parnoki Congress tir dang ashi.
“Rahul den ajurutepba dak alia onoki CPI national general secretary D Raja aser LJP president Ram Vilas Paswan na den-a ajurutep. Tenatia iba tebilemtsü ya Prime Minister aser Home Minister na den lemsateptsü nangzük” ta Amuco president Ph Deban Sharma-i osangbener dang ashi.
Naga yimjung maparen ajanga Manipur litsü nung mekongshitsüla ta parnoki PM aser HM na dang ashitsü onok dang nangzük, ta paisa shisem.
UCM, Amuco aser CCSK teloktemi Prime Minister Modi, home minister Rajnath Singh aser tanga central lennirtem den ajuruteptsü ta AMUCO president-isa metetdaktsü.
Manipur state sorkar aser nübortem nungi temelaba melii ‘Framework Agreement’ dak sendak telemtetba kecha Manipur nung kongshia magitsüla, ta parnoki takhangba agütsüba nung shia lir.
Maneni, Manipur nung Congress-i ‘Framework Agreement’ nung keta aliba onüktem yimjak nung metetdakjang ta takhangba agüja lungkak aitba manener.