Manipur menoknok atema teyari aika agütsüdar

Imphal/New Delhi, January 05 (Agencies): Manipur nung Hombarnü magnitude 6.7 menoknok agi kongshia nisung ti asüba den ki aika chirepba aser shisabulu agi sünga aliba tensa ka nung relief & rescue operation kanga tashi itta inyakdar.
Guwahati nungi National Disaster Response Force (NDRF) nung inyakertem menoknok atalokba tesemi oa ki chirepa nisung anenbangba bushiba nung kanga mazüngi yaritepdar.
Menoknok anokba tesem tiyong, Tamenglong district nung NDRF telok balala oa lir aser ano Silchar, Assam nung kodang nüngdakdir apusotsü atema atatepa lir. State yimtiba Imphal nung nija aser sorkar department kar den kaketrejutem shibanga lir. Manipur secretariat aser Imphal nung Ima shishilembaba tesemtem nung ki aika atena lir aser kaketreju ki karbo chirepogo.
Menoknok agi kongshiba Senapati aser Tamenglong district dak alaka tanüngba tesemtem nungbo electric-a yanglua tesangwa agidar. Power Grid Corporation nungi nisung asem agi akümba telok ka Manipur nung electric agütsüba maparen nung yaritepdar. Iba den külemi centre nungia orthopedics, surgeons, anesthesiologist aser technician tem dena mozü nung mongintemi lendong nung yirur alir nem teyari agütsüdar.
Iba menoknok agi nisung ti taküm samatsü aser nisung 88 yirua lir ta Manipur sorkari metetdaktsü.
Teyirur rongnung parnok 33 kanga mejungi lir aser parnok RIIMS aser JNIMS dena Manipur nung aliba mozüki balala nung anepaludar. Tanüngba teyirurtembo ‘first aid’ dang agütsürbo pei kidangi odaktsüogo.
Nija ki terara raksar alirtem kümzüktsü aser sorkar dang lendong ajanga raksaba kechisarena yanglushitsü asoshi National Disaster Management Authority-i mongintem yoktsü.
Sangdong ka ajanga ashiba agi, telecom tsütsü kanga bendanga agüja inyakdar aser BSNL nungi ketdangser tejen kari Imphal nung raksar aliba asadanga mera tasen agitsü asoshi tetuyuba agütsüdar.
Ministry of Home Affairs-i NDMA aser state sorkar den amalitepa nüngdakba teyari agütsütsü asoshi maparen tenzükogo, ta kasa sangdong ajanga ashi.
National Crisis Management Committee Delhi nung ajurutepa iba lendong atema asameyangtepogo. Iba senden nung Cabinet Secretary P K Sinha menden agi aser Manipur Chief Secretary-a video conference ajanga senden nung shilem agi.