Manipur menoknok lendong nung Facebook Group kati yariteper

Imphal, January 8 (Agencies) : Manipur nunger lanur telok kati menoknok nung timtemertem yariteptsü atema Facebook nung maparen ka tenzük aser parnoki teyari balala agütsütsü tenzükogo.
Yaküm Manipur nung tzümetsüng timtem ajurudanga iba kasa telok yagi timtemertem yaritsü atema mapa inyak. Parnok ya telok mesüra NGO kecha nung shilem mali saka Facebook nung parnok külemi teka amteper mapa inyaker.
Iba telok yagi Leimakhong Hills kübok P Maulding Nepali yimtsüng aser Senapati district nung Leimakhong ex-servicemen’s colony semdanga relief material agütsüogo. Parnokisa Kanto Sabal, Chingmang aser Premnagar yimtsüngtem nunga teyari agütsüogo aser Mumbai nungi tenla agütsürtem den parnoki mapang shia tongtetepa kombol aser süoshitem teyari agütsür.
Iba telok ya yaküm Manipur tzümetsüng lendong atalokba sülen arishi küm 30 tain shishilembar Devakishor Soraisam-i tenzükba lir.
“Onoki Facebook group, Flood Relief Manipur tenzük aser iba ajanga tangartemi onok den yaritep” ta Soraisam-i osangbener dang ashi.
Iba telok nung doctors, bankers, agriculture officers, businessmen, kaketshir aser mapa mongui aliba lanurtem-a kar dena lir.