Manipur menoknok nung nisung 9 asü, 100 tema yirua lir

January 4, 2016 nü Manipur yimtiba Imphal nung menoknok agi ki ka chireptsür aliba anasa tetsür chanu ka süia aodang agiba noksa angur. 

Imphal/New Delhi, January 4 (Agencies) : Hombar anepdang 4:36 ako meta Manipur nung menoknok tesashi ka anokba lendong nung nisung tenet tashi taküm samaogo aser ano nisung aika yirua lir.
Richter scale nung 6.7 magnitude asadangba menoknok anokbaji India kübok northeast nung dang masü saka Bangladesh, Myanmar aser Bhutan linüktem nunga metetogo.
Nagaland State Disaster Management Agency-i ashiba agi, state tesem ajungalen menoknok ajanga kongshi saka iba ajanga kiojen raksatsüba mesüra nisung yiruyibongba osang kecha mali.
Iba menoknok ajanga Imphal nung ki aika raksatsüogo aser jara aika laoba osang angazüker.
Indian Meteorological department-i ashiba agi, menoknok anokba tiyongtsüji Tamenglong district nung liasü aser state sorkari ashiba agi menoknokji Tamenglong kübok Noney yimtsüng nung anokba liasü.
Iba lendong nung tasürtemji Jiribam tesem nung liasü aser ano nisung 50 shi yirua mozüki balala nung anepaludar, ta Army ketdangsertemi ashi.
Teyirurtemji RIMS, JNIMS aser Shija Hospital nung anioka anepaludar, ta parnokia shisem.
Menoknok anokba tiyongtsü tesem Tamenglong nung nisung asüba osang mali aser tang tashi nung ki chirepba lendong nung nisung pezü kanga mejungi yiruba osang jangjaogo, ta district ketdangsertemi ashi.
“Barak ayong anasa menoknokji anok saka iba tesem nung teraksa kangabo maliasü. Ki kar raksaba dak alaka nisung asüba osangbo mali” ta Additional Deputy Commissioner Joseph Paulin-i ashi.
Prime Minister Narendra Modi-ia Twitter nung NDRF telok ka Guwahati nungi Imphal-i aotsü atema mapa lemzüktsüogo ta tanü metetdaktsü.
“Rajnath tang Assam nung lir aser pa den ni jembiogo. Menoknok ajanga timtem ajuruba tensa ketdangsüa yariteptsü atema ni pa dang shiogo” ta Modi-isa ashi.
Iba lendong nung Imphal nung women’s market building raksa, ta Manipur Works minister Ratan Khumujam-ia metetdaktsü.
Tanü Union minister of state for Home Affairs, Kiren Rijiju Manipur tonga aru aser pai menoknok agi teraksa bener arutsüba tesemtem sema senzü.
Rijiju den külemi minister of state in Prime Minister’s Office (PMO), Jitendra Singh-i Manipur chief minister Okram Ibobi Singh dena ajurutepa osang metetpelaogo.
Menoknok anokba sülen Hombar anepdang Cabinet Secretary, P K Sinha-i National Crisis Management Committee (NCMC) senden ka ayongzüka agi aser iba mapang osang metetpelaba den menoknok ajanga takoksa bener arutsüba tesem nung relief & rescue maparen aser teyari agütsütsü indang jembi.
NCMC senden nung züngsem 45 aliba National Disaster Relief Force (NDRF) telok ana Guwahati nungi Imphal aser ano telok ka Silchar-i yoktsü atema telemtetba agi.
Home Ministry sangdong ka nung, parnoki National Disaster Management Authority (NDMA), state sorkartem, Ministry of Defence, NDRF, Ministry of Telecom aser tanga bangdak Government departments aser agencies den osangtsüsang agitepdar, ta metetdaktsü.
Manipur, Assam, Tripura, Mizoram, Meghalaya, Sikkim, Nagaland aser West Bengal nung Relief commissioners den mapang shia tongtepratep südar, ta Home ministry snagdong nungsa metetdaktsü.
Hombarnep anokba menoknok ajanga Assam nung nisung pezü yiruba osang angazüker saka Tripura aser Mizoram nungbo lendong atalokba osang kecha mali.
Ano, Bangladesh yimtiba Dhaka nunga nisung asem tashi asüba aser nisung 100 shi yiruba osang metetdaktsüogo.