Manipur, Mizoram & Kerala nem teyari sen crore 305 agütsütsü

New Delhi, December 13 (Agencies): Home Minister Rajnath Singh lenisüba kübok Bodhbarnü temaba jenjang nung senden ka kaogo, aser iba senden nung Manipur, Mizoram aser Kerala state tem nung taoba ita tem nung yipru aser tzümetsüng nunger amala alimar yimya ajanga teraksatsüba bener arutsüba nung takoksa ajuruba atema teyari agütsütsü asoshi sen crore 305.14 agütsütsü telemtetba agiogo
Manipur atema sen crore 130.65 aser Mizoram atema sen crore 49.02 agütsütsü asoshi telemtetba agiogo. Iba state anaprongla nung ya taoba ita tem nung tzümetsüng aser anentsüh aluba ajanga teraksatsüba tulu adokdakja liasü. Kerala nung taküm tetenzüklen tzünglu maruba ajanga timtem kanga ajuruogo, aser parnok nem sen crore 125.47 agütsütsü lemtet. Maneni Kerala atema NDRF nungi sen crore 112.05 aser National Rural Drinking Water Programme (NRDWP) nungi sen crore 13.42 teyari agütsütsü asoshi telemtetba agiogo.
Iba senden nung tanga tongtibang nisungtem den Finance Minister Arun Jaitley, Agriculture Minister Radha Mohan Singh aser Union Home Secretary Rajiv Gauba nunger densema liasü.