Manipur mokdanga COCOMI-i longkak ait

Guwahati, October 31 (Agencies): Naga yimjung ken o atema tezüngzüktep agitsü ta bilema Brihostibarnü Manipur nung tesem aika mokdanga longkak aitogo.
Yasüng New Delhi nung Union Home Minister, Amit Shah-i, Naga agreement ajanga Manipur nunger litsü mekongshitsü, ta Manipur nungi lenirtem nem metetdaktsüba sülen Manipur Chief Minister N. Biren Singh leniba nung teshimtet lenirtemi Brihostibarnü longkak aittsü aliba thinen, ajisüaka state nung lokti tentet pongui akümba Coordination Committee Manipur’s Integrity (COCOMI)-i ayongzüka state tesem aika mokdanga liasü.
Party ajak nungi lenirtem dang Shah-i, Naga yimten teloktem den agreement magidang stakeholders ajak den jembitsü, ta shia liasü.
Manipur, Assam aser Arunachal Pradesh state tem nung Naga nunger aliba tesemtem longjemtsü atema NSCN (IM)-i akhangba anema Manipur nung telok balalai nokdaker.
Tanü COCOMI züngsemtemi Manipur yimtiba, Imphal nung longkak aitdang markets aser shisaliok reju ajak shibanga liasü.
Manipur nung district asem-Ukhrul, Senapati aser Tamenglong ya Naga nunger aliba tesem lir. Naga yimten teloktem den Centre-i agreement sign asütsü atema inyakba nung ajemdaker Manipur nung lendong ataloktsü tsübua Centre sorkari tensa azüoktsü atema sepai tali yoksema liasü.
Bodhbar aonung New Delhi nung Chief Minister, N Biren Singh leniba nung party balala nungi teshimtet lenirtemisa Amit Shah dang Naga agreement inyakyim ajanga Manipur nunger litsü aser yimtenren mekongshitsüla, ta takhangba agütsü.
Parnokisa, Naga yimtenren teloktem, talisa NSCN (IM)-i ozüng alema saru saruba ajanga Manipur nungeri timtem kanga nguogo, ta metetdakja liasü.