Manipur Naga MLA temi Naga nunger litsü kümzüka yunür

June 9, 2023 nü Niathu Resort, Chumukedima nung Manipur nungi Naga nunger MLA 10-i osangbener den jembidang agiba noksa ka angur.

Dimapur, June 9, 2023 (TYO): Manipur nung Kuki-Meitei ketdangsübaren balaka akümtsüsa kümra iba nung Naga nunger tesemtem nung mekongshitsüla ta Manipur nungi Naga MLA 10-i metetdaktsüogo.

Manipur nung Naga MLA 10-i Union Home Minister Amit Shah den ajurutepa state tensa osang lemsatepba sülen tanü Nagaland tonga aru.

Hokolbarnü parnoki Niathu Resort, Chumukedima nung osangbener den jembidang Union Home Minister dang Naga tesemtem nung mekongshitsü ashiba osang lemsatep.

“Manipur nung ketdangsübaren balala akümtsüsa kümra Naga nunger tesemtem nung mekongshitsüla kechiyong iba atema küm aika jembia arur aser tebilemtsü den khuret aika ajuruogo ta onoki Amit Shah dang shiogo” ta Manipur nung Water Resources, Relief, Disaster Management Minister Awangbow Newmai-i ashi.

Parnokisa Union Home Minister dang Naga nunger den asüngdangteptsüla kechiyong Naga nungeri India sorkar den yimjung maparen teinyakdak lir ta ashi.

“Naga nunger asoshi inyakyim tasen kar tenzüktsü süra, ibaji India sorkar aser Naga nunger tsüngda tang teinyakdak yimjung maparen nung aliba ama asütsüla kechiyong onoki teti atema lemtet ka agitsü imlar” ta Minister Newmai-i ashi.

Union Home Minister-ia Naga nunger MLA tem dang Manipur nung ketdangsübaren balaka tenzüktsü mesüra tanga sentong kar renemra, Kuki, Meitei aser Naga nunger ajak den asüngdangtepa inyaktsü. Shinga senzüka meyutsütsü saka tamasa yimjung alitsüla ta ashi.

“Naga nunger ya yimjung meimertem lir aser onoki rara anema noktaker. Onoki ozü kidangertem tsüngda rara madokdaktsünür. MLA tem ama onoki akokba tashi kin ana tsüngda tangatettep kati arutü atema inyaker” ta Minister Newmai-isa metetdaktsü.

Züngsem 10 agi akümba Manipur Naga MLA 10 rongnung NPF nungi par 5, BJP nungi 2, NPP nungi 2 aser Independent MLA ka dena lir.