Manipur & Nagaland CM temi Union Home Minister ajuru

New Delhi/Kohima, January 18 (Agencies): Union Home Minister, Rajnath Singh-i mepishiba nung ajemdaker tanü Bodhbarnü New Delhi nung Manipur Chief Minister, Okram Ibobi Singh-i pa ajurua liasü.
Senden nung Home Minister Rajnath-i National Highway-2 mokdangba ajanga Manipur nung nüburtemi timtem kanga ajangshiba atema tebilemtsü akaba metetdaktsü.
Rajnath Singh-isa, tanen makai National Highway mokdangba ajanga election ketdangsertem densema nüburtem senzüsenbongba nung timtem adoka state assembly election nung democracy inyakyima kongshitsü akok, ta arentaka bilemba olen ka lemsatep.
Union Home Ministry-i yaküm November 15 nü telok asem senden amentsü atema Manipur sorkar aser United Naga Council (UNC) na New Delhi-i jaoka liasü saka Manipur sorkari maden.
Home Minister-i, state nung tzüzüng-ozüng benoktsüji temzüng kübok state teinyaktsü mapa lir ta tamalen Manipur Chief Minister dang shia lir.
Tanü senden nung Singh-i, Manipur sorkari temzüng teinyaktsütem nung tamakok ngura, Manipur nüburtem timtem pongbatsü atema India sorkari Temzüng kübok tapet ozüngtem nung ajemdaker tanga meratem agitsüsa akümtsü, ta shiogo.
Home Minister-i jaokba nungsa ajemdaker tanü Nagaland Chief Minister, T. R. Zeliang-ia pa ajuru, aser iba mapang nung Singh-i T.R Zeliang dang Dimapur aser Mao Gate tsüngda NH-2 lapoktsü atema pa teyari meshi, iba den külemi iba tongtibang lenmang nung tetsükdaktsü kecha melidaktsütsüla, ta ashi.
Union Minister-isa Zeliang dang, Manipur nung aliba Naga lenirtem dang parnoki mokdangba agientsü ajungshiang aser Manipur sorkar den telemtetba tajung ka dangi arutsü atema inyakang, ta mepishi.
Ibaji langzüa Nagaland Chief Minister, Zeliang-i, UNC-i akhangba ama telok asem- UNC, Manipur sorkar aser India sorkar tsüngda Manipur nung Senapati mesüra linük yimtiba, New Delhi nung senden ka ayonga akatsüla, ta ashi.
Kasa senden nung Manipur Chief Minister, Ibobi Singh aser Deputy CM, Gaikhangam nata liasü, aser tenatia telok asem sendenji Imphal nung amen ajungtsü, saka iba ama senden kaji New Delhi nung amen nunga junger, ta ashi.
Iba sülen Home Minister-i, iba sendenji state assembly election matongdangsa tekaraba nung akatsü nüngdak, ta ashi.
Iba sendenji January 23 nü Imphal nung mesüra New Delhi nung amentsüla ta lemtetba sülen Zeliang-i tanü senden nung adenertem jembibaji Manipur nung Naga lenirtem nem metetdaktsütsü, ta ashi.
Iba dak alia Nagaland Chief Minister-isa Manipur-i aoba truck aser tanga garitem sadema senzütsü atema inyaktsü ta ashiba oji Home Minister aser Manipur CM napronglai pelaa agizüka liasü.