Manipur NH 37 nung telungpurtemi garitem amak

Imphal, Apr 18 (Agencies): Manipur kübok Kangpokpi district nung Mongulbarnep Kuki nunger ta temulung melemi bilemba telungpur kari totzü abenba garitem dak injang khaloktsü, ta police-i metetdaktsü.
National Highway No. 37 nung tanep 5:45 ako meta Assam nungi Imphal leni aruba truck aser totzü abenba garitem dak injang khaloktsü. Idangji garitem meinba CRPF sepaitemi meyiper telungpur dak injang khaloktsü, ta police-isa ashi.
Iba mapang petrol aser diesel abenba gari ana dak injang agi khashi saka tia ka garitem nung mi aploka mapok. Osang angazükli police unit tem tesem tonga ao.
“Totzü abenba garitem apok asübo timtem tulu ajurula. Onoki iba inyakyim kukua aitsür.” ta iba tesem nung alir T. Kipgen-i osangbener dang ashi.
“CRPF jeep gari ishikati meinba ajanga Highway nung gari 600 dak tema kümzüka meyutettsü. Sorkari national highway ana nung Indian Reserve Battalion (IRB) aser police commando tem mapa lemzüktsütsü ta asüba onoki pelaa agizük” ta driver Laishram Chinglien-ia osangbener dang ashi.
“Ajisüaka, All Naga Students’ Association Manipur (ANSAM)-i sepaitem lemzüktsütsü tebilemba anema nokdak aser sorkar parnok dang kecha meshiteter aser mapa kecha meinyaker” ta paisa shisem.
Tesüiba mapangtem nunga police commandos aser IRB personnel tem Ukhrul aser tanga lisopurtem aliba district nungi anienogo. Sorkari highways anüktsü atema mapa lemzüktsütsü tebilembaji sota lir, ta ketdangser kati osangbener dang ashi.
Sorkari Naga nunger litsü nung sepaitem lemzükbaji ANSAM aser tanga Naga teloktemi anema nokdaker.
United Naga Council (UNC)-i ita pezü dak tema Manipur nung highway ana mokdanga liasü.
Naga nunger litsü nung district tasen tenet tentetba anema UNC-i highway tem mokdanga liasü.
Tanü Chief Minister N. Biren Singh-i par cabinet züngsemtem den tensa indang osang metetpelatepa liasü.
Osang angazükba agi, highway tem nung sepaitem talila mapa lemzüktsütsü aser kobi melii IRB personnel aser police commando tem mapa lemzüktsü akok.