Manipur NPF-i party tangatetba nung noktaktsü

Dimapur, Luroi (August) 3 (TYO): Manipur nung NPF MLA pezüi NPF party den akangakanga noktaktsü aser Naga nunger ajungkettsü atema mapa inyaktsü ta Manipur nung Naga People’s Front Minister, L Dikho-i tanü ashi.
Tanü Central office nung Central Office Bearers aser NPF MLA tem tsüngda NPF Consultative meeting amendang Minister Dikho-i “NPF party ya Naga nunger atema party tajungtiba aser ibaji talisa Manipur state nung Naga nunger atema lir” ta ashi.
NPF party-i yariba atema paisa pelaba metetdaktsüba den “Manipur nung NPF ya political party tajungba kümogo aser party MLA pezüpronglai party tangatetba nung noktaktsü” ta shisem.
Manipur nunger MLA pezü Naga nunger ajungkettsü atema tajungtiba agüja inyaker aser sorkar nung NPF adenba sülen tensa tajungba kümogo, ta Dikho-isa ashi.
Tanü senden nung NPF President, Dr. Shürhozelie Liezietsu aser NPF Legislature party leader, TR Zeliang naprongi Manipur nungi MLA pezüi party tangatetba nung noktaktsü ta asüba atema pelaba metetdaktsü.
Senden nung NPF Manipur State Unit President, Awangbow Newmai-i Manipur nung BJP-i aniba sorkar aser ADC nung NPF MLA temi shilem agia aruba osang lemsatep.
NPF Manipur unit-i party temzüng sülen anidaktsü, ta Awangbow Newmai-isa shisem.
Senden nung Dr. Shürhozelie-i Manipur state nungi W.Morung nem working president central inyaktsü atema tenzüngzüktep agidaktsü.
Senden nung Manipur nungi NPF MLA pezüprongla aden, ta Press Bureau, Naga People’s Front, Central Headquarter sangdong ka nung metetdaktsü.