Manipur NPF-i Party telongjem atema inyaktsü

Imphal, July 23 (Agencies): Nagaland nung NPF lenirtem mepetmesü adoka aliba atema tesünep bener arutsütsü asoshi Manipur nungi Naga People’s Front (NPF) lenirtemi inyaktsü, ta osang angazüker.
Taoba Mongolbarnü NPF Tir, Shurhozelie Liezietsu-i, party-i BJP den tesendaktep raksaogo, ta sangdongba sülen NPF Manipur unit kodamesüi lir. Nagaland nung tashi raktepdang BJP-i Liezietsu anema TR Zeliang ang pusemtsü telemtetba agia liasü. Manipur nung NPF ya BJP-i aniba teloktep sorkar nung densema lir.
Hokolbarnü Manipur NPF general secretary, Ningreingam Ruivah-i, “Kü tangatetba nungbo, party-i NDA mesüra BJP den tesendaktep pilatsü atema telemtetba agibaji kanga keraa agi. Onoki ano anogo ishika iba tensa ya repranga atasü, iba sülen party telung nung mangatettep aliba bentettsü atema merangtsü,” ta metetdaktsü.
Ruivah-isa iba tensa atema jembitsü asoshi NPF-i senden ka ayongtsü ta metetdaktsü.
“Manipur nung NPF longjema lir. Yangibo kecha agia timtem madoktsü. Onoki bangdak lenir akhümtsübur, ajisüaka party longjema alitsüji onok nükjidong lir,” ta paisa metetdaktsü.