Manipur nüburi sorkar melentsü yongyar: BJP

Imphal, December 10 (Agencies): Manipur nung rongsenkettsüng lenmang mokdangba ajanga nüburtemi timtem ajuruba pungbatsü atema Chief Minister, Ibobi Singh-i kecha meinyaker, ta aija tanü Union HRD minister, Prakash Javadekar-i, taruba state assembly nung sorkar melenshitsü atema nüburtem renema lir, ta metetdaktsü.
Imphal nung osangbenertem den jembidang Union Minister-i, “Congress sorkari Manipur ya state tamajungtiba rongnung ka kümdaktsüogo aser iba (Cong sorkar) ya khenyongi tamakok ka lir,” ta ashi.
“Ajaki elections atadar aser telemtetbaji agiadokogo,” ta paisa shisem.
Sangküm küm tetenzüklen agitsü aliba assembly election dak sentakba nung anogo ananü atema state semdanga alisang Javadekar-i, “Congress sorkari lemsar yimsütsütsü atema lendong aketba tasa benoker. Tang rongsenkettsüng lenmang mokdangba ajanga nüburtem kanga timtemdaktsüba ya state sorkar ajanga lir,” ta ashi.
“Nüburtemi ajangshiba timtem pungbatsü atema state sorkari kecha meinyaker,” ta pai ashi.
Pai ashiba agi, tang rongsenkettsüng lenmang mokdanga liaka Manipur nung security sepaitem den paramilitary sepai teyari ajanga Mao Gate, Senapati district, Jiribam district aser kidanger Nagaland nung anendena aliba truck noklang aika meiner aru.
Mapa agütsütsü aser ajak nem shisaliok agütsütsü, ta nangzüka Union Minister-i, BJP-i Congress sorkar indang sen tashiji tamakok ngudaktsütsü, ta ashi.
“Congress sorkar tangatetbaji, sorkar tashii marudang sen alemtsü, aser tashi anguba sülen sen bendentsü lir,” ta pai aitsü.
Javadekar-isa, Election Commission-i election sentong sangdongba sülen BJP-i assembly election atema candidate tem tenüng sangdongtsü, ta metetdaktsü.