Manipur nüburtemi pei litsü kümzüka ayutsü bangjem

Imphal, June 18 (Agencies): Manipur nunger litsü kümzüka ayutsü atema raradang taküm bendanga agüja asür nisung 18 nem tanü nisung merirjang aikati tetushi agütsüogo aser parnok litsü kümzüka ayutsü atema bangjemogo.
Tanü Imphal, Kekrupat nung 15buba Great June Uprising and Unity day amung, iba ya All Manipur United Clubs Organisation (AMUCO) den United Committee Manipur (UCM) aser Manipur nung community temi ayongzüka liasü.
Deputy Chief Minister Gaikhangam lenisüba nung state-i memorial complex nung tetushi agütsü, iba sülen Minister tem, MLA tem, yimtenren party balala nungi aser lokti tentet balala nungi akhüm agütsü.
2001 June 18 anogo nung Centre-i NSCN(IM) den Nagaland nung dang masü saka state adena orr ceasefire alitsü telemtetba agiba atema Manipur nung nisung aikati anema noktaka liasü.
Parnoki NSCN(IM)-i Naga nunger aliba lushi ajak dendaktsütsü tebilemba anema noktak aser CRPF o police-i injang yokdang nisung 18 asü. State tesem aika nung kümshia iba anogo ya Great June Uprising and Unity day ta ayonga amunger. Naga organisations, Kuki organisations, Muslim, tetsürtem, tribe tem aser Meitei nunger lenirtem shirnok iba sentong nung dena liasü, parnokia Manipur telongjem atema inyaktsü nangzük.
Naga lenirtemi, lokti tenet aika lir aser parnoki pei aginüba ajak akhanger, saka asenoki longjema alitsüla ta bilemtettsüla, ta ashi.
Kuki Inpi Manipur nungi Khongsai-i, nüburtem longjema lira kecha tashi agia telemsa madokdaktsütettsü, ta ashi. Paisa, Kuki nunger kari Inner Line Permit agizüktsüji memelunger, kechiyong tawa ang parnok Manipur-i aru ta asüba tangatetbaji tai, ta ashi.
Kuki tribe temji akhidang yongi Manipur nung liasü ta shia pai, lokti tentet lenirtem dang longjmer tebilemtsü onük ajak bentettsüla, ta ayongzük.
Kasa sentong nung  Manipur State Minority Commission mendenbuba, Dr Syed Burhanuddin densema AMUCO, UCM aser community ajak nungi lenirtemia jembia liasü.