Manipur nung aayanger 2 dak injang kahloktsü

Imphal, June 8 (Agencies) : Manipur nungi Uttar Pradesh nungi aayangi arur nisung ana dak mejangjatetba nisung kati injang agi akah, ta Bodbarnü police-i metetdaktsü.
Kisür ana, Ramu Patel aser Surender Patel na küm ka tejaklen Manipur nung arua mapa inyaker aser Mongulbar aonung tena dak injang kahloktsü, ta police-isa ashi.
Tena Impahl kübok Thangmeiband nung shishilembadang, ammang nung nisung ka arur tena dak injang kahloktsür jena ao. Tena kanga mejungi yirua lir, ta police ketdangser kati ashi.
Taoba mapang Manipur nung tangalen nungi aayangi arurtem dang oadokang ta ashiba aser teka sangshiba tatalokba aika liasü, saka India tesem balala nung Manipur nunger kaketshirtem aser mapa inyakertemi tangari parnok dak mang ayangtsü ta anema noktakba sülen item tatalokba anen.