Manipur nung ak wara poktetogo

Imphal, September 09 (Agencies): Manipur nung shiruru health mongintemi India-Myanmar arrtsülen Moreh nung ak wara (Swine fever) poktetba osang Hokolbarnü metetdaktsüogo.
Osangbenertem den jembidang ketdangsertemi, ak jenti asüba tashidak ya tanga tesemtem nunga prokshiba nokdangtsü atema mera kar agiogo, ta metetdaktsü.
Ketdangsertemisa, ak kar süogo aser tang ak aika shirangdar, ta metetdaktsü.
Ketdangser kati, “Manipur tesem balala nung aliba aktem rongnung iba tashidak agi kanga bulua shiranger. Aktemji chi mebangnanger, anünür aser tatemsabo asür. Mapang shitak nung mozü agütsüra aktemji kümzüktsü,” ta ashi.
Tang tashi nungbo official sangdong kecha agüja mali, ajisüaka district ketdangsertemi International arrtsülen nungi ak bener arutsü memelar, koba ajanga state nung ak shi ayokba kanga ajema kümogo.
Iba tesem nung ak asüba ajanga tribal nisungtem kanga takoksa ngudar, aser sorkaria teyari kecha magütsür.