Manipur nung anogo pungububa ILP atema lungkak aiter

Imphal, July 12 (TYO) : Manipur yimtiba Imphal nung Deobarnü lanur aser tetsürtemi mangyimba süoshi sobur lungkak aitba sentong ka agiogo.

Parnoki Manipur nung ILP inyakyim tenzüktsü atema sorkar nem takhangba agüja lungkak ait.

Taoba Bodbarnü ILP atema lungkak aitba sentong ka nung Class 11 nung azünger kaketshir ka police den raradang asü aser iba sülen lungkak aitba sentong tesashiba nung agiyonga arur.

Ibobi Singh’er sorkari Bodbar nü Greater Imphal tesem nung curfew alitsü ozüng agütsü saka lungkak aitertemi iba ozüng anema sentongtem maneni agiyonga arur.

Deobarnep nübortem lijaliyongtsü atema ghonda 7 curfew agien saka iba mapang nunga Imphal tesem ajaklen sepaitem mapa lemzüka liasü.

Hokolbarnü state assembly session tembangba anogo nung Ibobi Singh-i lungkak aitertem dang sorkari joint committee pur jaoka senden alitsü ta nangzük.

Tangalen nungi aayangi arurtem aika akümba ajanga aser parnok mita reprangtsü atema ozüng maliba ajanga Manipur lokti, sobaliba aser yimten mapa nung timtem ajurur ta lisopurtem aitsür.

Manipur den arrtsüa aliba Arunachal Pradesh aser Nagaland nungbo ILP o restricted area permit (RAP) maparentem tenzüka lir.