Manipur nung AR-i bomb aika apu

Kohima, Luroi/August 6 (TYO): HQ IGAR (South) kübok Assam Rifles Battalion puri, Independence Day mamung tsüngda mepet mesü adokdaktsütsü asoshi ozüng raksar kari merangdanga aliba nokdangogo. Parnoki explosives aika ngutetogo. Parnok ya telungpur asütsü ta temulung melemi bilemer.
Independence Day 2019 matong tsüngda security akangshyonga aoba mapang ka nung AR Battalion-i Indo-Myanmar arrtsü nung telungpurtem inyakyim nokdangtsü asoshi sepai aika yokogo.
August 3 aonung Myanmar nungi India-i aitsü meranga aliba nisung kar sepaitemi nokdang.
Ajisüaka tzünglu kanga sashia aruba den tamang dak jenoker telungpurtem jena oadok. Iba sülen tasüngnü meita aoba sentong ka achaayanga agi aser iba mapang nung AR sepaitemi Chinese made hand grenades pezü, local hand grenades 21, mine ka, detonator 29 aser gelatin seret 21 nguteta liasü. Maneni bushitsüngdangtsü atema parnoki apuba osettem ajak police ket nung bendanga agütsüogo.
Iba inyakyim ya telungpur inyakyim asütsü ta temulung melemi bilemer, shirnoki Manipur nung Independence Day amungba meinprongtsü meranger. Assam Rifle sepaitemi mapang shidak nung jenjang tapet agiba ajanga tarutsü nung timtem lendong ataloktsü aliba nokdangogo, ta PRO (DEF), Col C Konwer-i sangdong ka ajanga metetdaktsü.