Manipur nung AR-i sen lakh 89.5 jenjang temesepba mozü apu

Imphal (Manipur), August 20 (Agencies): Honibarnü Assam Rifles sepaitemi Manipur nung mozü shibelener ka apu, aser pa ket nungi sen lakh 89.5 shi jenjang temesepba mozü balala puogo.
Yashi, Honibar nikongdang 2:35 ako meta Tengnoupal District kübok Moreh-Imphal lenmang nung Maruti gari ka soter mita reprangdang 12 Assam Rifles sepaitemi item mozüji apu.
Iba gariji mita bushidang Heroin gram 60 aser WY mozü süngjang 1900 apu, aser ibaji sen lakh 89.50 shi jenjang lir. Pua alisang den mozüji Moreh nung aliba Customs ketdangsertem ket nung agütsüogo.
Ano külen tanga osang ka nung, India Independence Day benjungmong dak sendakba nung Hokolbarnü HQ IGAR (South) kübok 9 Sector Assam Rifles indang 45 Assam Rifles-i Imphal East district kübok Lairak Yengbam Leikai nung aliba Govt High School nung painting competition ka ayongzüka liasü.
Iba tetoktepba nung class 6 nungi Class 9 kaketshirtemi shilem agia liasü. Iba tetoktepba omenji ‘Independence Day’ liasü aser takok angurtem nem senpet agütsü.
Iba sentong ayongzüka katsüba atema School Principal, Wt. Tamphasana den tesayur ajaki Assam Rifles dang pelaba lemsatepba den külemi tarutsü nunga item ama sentong ayongzüka katsütsü mepishi.