Manipur nung AR telok ka lendong nungi kümzük

Imphal, September 04 (Agencies): Manipur kübok Chandel district nung telungpurtemi ‘remote-controlled bomb’ amshia 12 Assam telok ka amaktsü merang saka tamakok angu, ta ketdangsertemi metetdaktsü.
Imphal nungi bomb raksaa endokertem tesem tonga oa bomb ji raksaa endok, ta parnokisa ashi.
Tanü nikongdang 2:00 ako meta Assam Rifles telok kati Kwatha Khnnuou leni aoba gari lenmang nung bomb ka rema aliba reprangtet. Iba tesemji Trans-Asian highway No. 1 nungi tatsüka pilar dang lir, ta Intelligence osang ka ajanga ashi.
Ano police osang ka ajanga, iba lenmang tezülen aser süngdong kongsangtem nunga bomb alenloka yuja liasü amai angazük, ta metetdaktsü.
Iba tesem tonga Assam Rifles sepai talila yokba sülen parnoki anameta aliba tesemtem mita ao, saka temulung melemi bilemer shinga mapu. Telungpurtemji jena orr liasü, ta police ketdangser kati ashi.
Iba dak sendakba nung police-i ken o ka benokogo aser külen telungpur telok shingaia bomb yutsüba atema tenüng agiba osang mali.
Mapang shia Manipur nung Myanmar den arrtsüa aliba district nung telungpurtemi sepaitem amaker aser tatalokba balala nung nisung aser sepai aika taküm samaogo.
International arrtsü nung telungpurtem senzüsenbongba mittsü atema Moreh nungi kilometer 10 arrtsü atsüdangtsü atema mapa tenzük. Ajisüaka, iba atsüji Manipur litsü telunglen talangka atsünga aiter yangluba ajanga anentsüsa aküm.
Iba atsü ajanga Manipur kübok yimtsüng 10 kongshir aser talisa Ukhrul district kübok Choro Khunnou yimtsüngbo Myanmar nunger litsü küboki aittsüsa akümer.