Manipur nung Army amaker nisung 14 NIA-i jangjaogo

New Delhi, July 08 (Agencies): Taoba ita Manipur nung army 18 tepseter Naga telungpur parnok 23 nungi nisung 14 bo jangjaogo.
Tang tashi nung kuli bendena aliba nung ajemdaker NIA-i, June 4 nü Manipur, Chandel district nung sepaitem amakba nung nisung 23-i shilem agi aser army-ia raradang parnok rongnungi nisung anabo tepsetogo, ta ashiba sorkar osang ka ajanga metetdaktsü.
Moltung nung telungpurtemi amakba mapang nungji sepai 18 asü aser 15 yirua liasü.
Telungpurtem jagi telok asem küma lemsar amak aser teraksatsüba tamajungba asütsü atema gari lenmang tiplen tapoktsü oset remja liasü, ta osang ajanga ashi.
Tapoktsü pongdang kar apok aser mamshiba kar ngutetta forensic tetendangba asoshi yoka liasü.
Tang tashi nung NIA-i NSCN-K Regional Commander arishi küm 40 Khumlo Abi Anal kija pua lir. Iba amakba asameyangba nung pai shilem agia lir südi ta mulung malemer.
Taküm March ita nung NSCN(K)-i India sorkar den ceasefire tezüngzüktep agienba sülen ‘United Liberation Front of South East Asia’ kübok northeast telungpur telok kar den longjemer parnoki sepaitem aiben makogo.
Iba tatalokba dak sentakba nung NIA-i Indian Penal Code, Arms Act aser Unlawful Activities (Prevention) Act section balala nung ken o ka benokogo.
Amakbaji India sorkar anema rara jazükba inyakyim lir, aser ibaji Nationalist Socialist Council of Nagaland (Khaplang) telok-i North Eastern state tem aser Indo-Myanmar arrtsülen inyakba telungpur den senteper inyak ta tonglokja lir, ta NIA-i ashi.
“Iba amakba sentongji NSCN (K) Mendenbuba Khaplang Pangmi-i anir tongti lenirtemi asameyang südi ta melung malemer,” ta NIA-isa ashi.