Manipur nung Army-i Airtel & ATSUM anema FIR benok

Guwahati, July 25 (Agencies) : Airtel-i Manipur kübok lisopur aliba tesemtem nung pre-active mobile Sim cards lema agütsüba anema Army-i FIR ka benokogo.
ATSUM (All Tribal Students Union of Manipur)-i kuli kecha memeshii dang Airtel indang pre activated SIM cards lema agütsür aser iba ya security indang khuret dang masü saka Department of Telecommunication (DoT) anema inyakba mapa ka lir, Manipur nung Army-i sangdong ka ajanga metetdaktsü.
Kuli memeshii alemba SIM cards 2000 shi lir aser item SIM card ya telungpur keti ao nungbo mitkartemi inyakba mapa nung tetsüdaktsü ajututsü. Iba osang ya Guwahati nung aliba Airtel ketdangser nem metetdaktsüogo aser pai iba onük atema mapa inyaktsü nangzükogo, ta Army sangdong nungsa shia lir.
Army-isa Airtel aser ATSUM anema FIR benokogo. ATSUM den tesentaktep alir nisung ka Army-i apuba ajanga iba ozüng alema inyakba mapa ya metet. Iba nisung yagi Sim cards lema lia Army patrol ka iba tesem süi aser idangji pa apu.
Guwahati nung Airtel atema otongdar kati ashiba agi, “Army-i ken o ka benok aser ibaji onko bushisüngdang südar. Tebilemtsü khuret abenba company ka ama onoki sorkari inyakyim aser temzüng lateta ama mapa inyaktsü. Onoki iba mapa bushisüngdangtsü tenzükogo aser nüngdakba mapang ketdangsertem den yariteptsü.”