Manipur nung BJP aser NPF külemi dang lir

Imphal, Tsüklai 19 (Agencies): Nagaland nung NPF aser BJP tsüngda tesentaktep pilaba ajanga Manipur nung teloktep sorkar nung timtem majurutsü ta Manipur nung BJP general secretary, N Nimbus Singh-i ashi.
Züngsem 60 agi akümba assembly nung Manipur teloktep sorkar nung züngsem 40 lir. Parnokji BJP nungi 30, NPF aser NPP nungi pezüzü, LJP nungi ka aser Independent MLA ka lir.
NPF MLA pezü rongnung, Losii Dikho-i public health & engineering department, printing & stationary portfolio bena lir. Tanüngba asem- Awangbow Newmai, Khasim Vashum aser K Leishiyo nungertem N Biren Singh’er sorkari parliamentary secretary tem ama shima liasü saka yaküm item mapa agiena liasü. “Nagaland nung yimtenren tsütsü temelenshi adokdang NPF-i BJP den tesentaktep pila saka iba jagi Manipur nung teloktep sorkar atema timtem bener marutsü. Manipur nung NPF mesüra BJP-i Nagaland nung yimtenren tensa atema tebilemtsü kecha mali. Manipur nung tang aliba sorkar ya tetsükdaktsü kecha melii aotsü ta amanger” ta Nimbus-i Amungnü osangbener dang ashi.
BJP Manipur unit nungi züngsemtemi Tripura nung BJP candidate tem yarir aser BJP vice-president Sh Premananda Sharma-i Meghalaya nung nüboyimba sentong nung yaritepdar, ta paisa ashi.
“Onoki Tripura nung BJP candidate shjashia nübo ana nungi asem tashi lemzüktsü. Manipur nungi BJP MLA tem aser minister temia Meghalaya aser Nagaland nung nüboyimba sentongtem nung yariteptsü” ta Nimbus-isa shisem.