Manipur nung bomb agi nisung 2 pokset

Imphal, November 3 (Agencies) : Hombar aonung Manipur kübok Thoubal district nung MLA kla kima nung bomb tesashi ka apok aser iba tesem nungi tasümang ana ngutetogo.
Iba lendong ya Wangkhem assembly constituency nung MLA K Meghachandra Singh’er Yairipok Bishnu Naha yimtsüng nung atalok.
Iba tesem nung mang ana kanga mejungi poksar aliba angu aser tena yagi bomb ji two wheeler ka nung bena lia apok amai temulung melemi bilemer, ta police ketdangser kati ashi.
MLA’er gate anasa tasümang ana denji two wheeler kanga mejungi poksar aliba ka ngutetogo, ta ketdangserisa ashi.
Iba tatalokba mapang MLA ji kidang maliasü. Pa ya Directorate of Information and Public Relations Parliamentary Secretary lir aser pa Imphal nung liasü, ta police-isa metetdaktsü.
Tasümang kabo driving licence ajanga ajitetogo aser iba nisungji Imphal East district kübok Poirou Khongjil yimer Nameirakpam Boboi liasü.
Küm ishika tejaklen telungpur telok ka nunga adentsü atema pai ki toktsür aoba liasü saka pa den külemi anguba nisung jibo ano mejangjateter.
Iba dak sendakba nung police-i ken o ka benokogo aser bushisüngdang südar.