Manipur nung Congress aser BJP-i tanga party teyari bushir

Imphal, March 12 (Agencies): Manipur assembly elections nung Congress-i menden 28 aser BJP-i menden 21 nung takok anguba sülen party ka temejai sorkar mekümtettsüsa tensa ka nung lia party anapronglai sorkar akumtsü atema tanga party tem teyari bushidar.
Honibarnü Manipur assembly election osang mesangdongdangyongi Congress aser BJP lenirtem napronglai sorkar akumtsü atema tanga party tila dang nungi teyari bushia liasü.
Assam Finance Minister aser North Eastern Democratic Alliance convener, Hemanta Biswa Sarma-i, “Naga People’s Front (NPF)-i shidi ajanga Angh, Najma Heptullah dang parnoki BJP pusemtsü ta shiogo,” ta metetdaktsü.
Congress lenir tain aser Chief Minister, Okram Ibobi Singh-ia party tilatem teyari bushidar.
Ano BJP lenir taintemia tila party tem den lokteptsü atema ketdangsüa inyakdar.
BJP CM candidate, Thounaojam Chaoba-i tamakok ngua liasü, ajisüaka party-i pa melen tanga nübo ka shimtsü.
BJP otongdar, Nongthombam Biren-i, “BJP-i tanga teloktep teyari agia sorkar akumtsü,” ta ashi. Ajisüaka pai item party tenüngbo memetetdaktsü.
Manipur nung Lok Janshakti Party (LJP)-i menden ka aser Naga People’s Front (NPF) menden pezü angu, aser parnoki BJP yaritsü ta sangdongogo, kechiyong Centre nung NDA sorkar nung parnok loktepa lir.
Ano National People’s Party-a BJP den lokteptsüsa lir, saka tang tashi nungbo parnok telemtetba sangdonga mali.
Küm ter tejaklen Congress-i parnok sasa sorkar kümtettsüsa liaka Communist Party of India (CPI) den loktepa liasü.
Ano tanga osang ka ajanga ashiba agi, kobi melii Congress lenirtemi state Angh, Heptullah ajurua sorkar akumtsü atema asüngdangtsü.
“Single largest party asünungji Congress nem tama maongka agutsütsüla,” ta Congress lenir kati ashi.
Ajisüaka BJP lenir, Biren-i, “Democracy nung nübo/züngdangba ajanga lateter. Tanga party-i nungita tangbo onok majority lir. Kobi melii onoki sorkar akumtsü atema asüngdangtsü,” ta ashi.