Manipur nung Congress-i menden 278 nungi 108 nung takok angu

Imphal, January 17 (Agencies) : Manipur nung January 11, 2016 nü agiba municipal council aser nagar panchayat elections nung Congress-i menden 278 nungi 108 nung takok nguogo.
Manipur kübok district pezü – Imphal West, Thoubal, Imphal East, aser Bishnupur nung municipal councils 18 aser nagar panchayats 8 nungi councillors 278 aser nagar panchayat züngsem 586 shimtsü atema iba elections agia liasü.
Honibar aonung tesü municipal council menden 278 atema sangdongba results nung Congress-i menden 108, Bharatiya Janata Party-i 62, Communist Party of India-i 2, Lok Janashakti Party-i 4 aser Independent 102 takok anguba metetdaktsü.
Shitakba agibo iba elections ya menden 279 atema liasü saka menden ka atema tetokteper maliba agi tazüngla lir.
Municipal council aser nagar panchayat elections nung takoker osang metetdaktsüba sülen Manipur Deputy Chief Minister Gaikhangam aser BJP state unit president Thounaojam Chaoba na katika anema kuli agütsüteptsü tenzükogo.
Gaikhangam-i ashiba agi, Independent candidate timbaka Congress-i yaria yok aser takok angurtem Congress nung adentsü tenzükogo.
Ajisüaka, BJP lennir Chaoba-i ashiba agi, Congress-i menden 199 atema dang candidate yoktet aser iba jagi parnok tashimeiti akümba sayur.
Taoba mapang municipal council aser nagar panchayat nung BJP züngsemtem maliasü aser tan elections nung menden aika takok angubaji takok ulura lir, ta Chaoba-isa shisem.
“Iba ya ajanga Manipur nung Prime Minister Narendra Modi indang tashi sayur. 2017 assembly elections nungbo onoki Congress ket nungi yimten tashi agitsü” ta paisa metetdaktsü.
Ano külen, Deputy chief minister Gaikhangam-i Congress tashimeiti akümer ta ashiba olen meyiptsü. Pai ashiba agi, Congress tashi itta dang lir aser 2017 küm elections nung assembly kümsük pezübenbuba atema takok angutsü.