Manipur nung Congress MLA ana BJP dangi meyip

Imphal, January 26 (Agencies): Manipur nung Assembly election agitsü ita ka shi dang lia, Congress MLA, Nimcha Kipgen aser V Valte na BJP dangi meyipogo.
Ibaji ajanga Manipur Assembly nung menden 60 aliba nungi Congress teloki menden 47 agia aliba nungi menden 45-i aluogo. 2016 küm Congress telok nungi tejen nisung asem, N Biren, Y Erabot aser Francis Ngajokpa nungeri iba telok toktsür BJP nung oa aden.
Saka BJP ajanga taruba election nung par telok nungi tokteptsü candidate tenüngtem metetdaktsüogo.
Item rongnung taoba Manipur Pradesh Congress Committee (MPCC) tatong tir, Nongthombam Biren Singh-i Heingang constituency nungi BJP tenüng nung tokteptsü aser taoba mapang Congress telok nungi minister inyaksang, Yumkham Erabot Singh-i Wangkhei constituency nungi tokteptsü.
Tang mezüng agütsüba candidate tenüngtem nung, Election Management Committee convener, Chaoba Singh-a lir aser pa Nambol constituency nungi tokteptsü. BPJ indang Central Election Committee senden ka New Delhi nung Hombarnü mena item tenüngtem ya agüja liasü.
Item rongnung, BJP lenir tejen, O Joy Singh-i Langthabala constituency aser Biswajit Singh-i Thongju constituency nungi tokteptsü.
Manipur nung United Naga Council (UNC)-i rongsenkettsüng lenmang mokdangba sentong tenzüker ita asem jungnüa arudar. State sorkari Manipur nung district tasen tenet tentetba anema iba mokdang ya tenzük.
Iba ama tensa mapang tamajung ka nung Manipur assembly election ya March 4 aser 8 nung agitsü sentong lir. Iba election junga agitsü nükjidong nung UNC, Manipur sorkar aser Central sorkar tsüngda yimjung kati arutsü asoshi jembiba mapang ka lir.