Manipur nung Congress MLA ka anenogo

Imphal, December 03 (Agencies): Manipur nung Congress MLA, Janghemlung Pamei-i state assembly aser par party nungi anenogo; pa Naga People’s Front (NPF) nung adentsü akok, ta party osang ka ajanga ashi.
Zeliangrong Naga nunger, Pamei ya Tamenglong constituency nungi liasü aser Brihostibarnü pai assembly Speaker, Th Lokeshwar Singh aser Manipur Pradesh Congress Committee Tir, TN Haokip na nem sodi meshiba shidi agütsü, ta ketdangser osang ka ajanga ashi.
Kasa osang ajanga ashiba agi, Haokip dangi züluba shidi nung Pamei-i, par constituency nüburtem aser state nüburtem atema pai iba telemtetba agir ta shiogo.
Ita ishika tejaklen Congress MLA tem- Y Erabot (chief minister Okram Ibobi Singh den yimtenren nung tsükchir), N Biren Singh aser Francis Ngajokpa nungeri Congress party toktsür BJP nung aden.
Sangküm Assembly election nung Pamei-i NPF ticket nungi tokteptsüa akok.
Ano külen Congress aser BJP nati election atema nüboyim tenzükogo. Party anapronglai yimtenren senden aiben mendar aser state tesem ajaklen poster campaigns kaogo.
Meimchir temeten atema nokdaker, Irom Sharmila Chanu’er party- People’s Resurgence and Justice Alliance (PRJA)-ia yimtenren senden tenzükogo. Brihostibarnü PRJA-i state nung ajangshiba timtem onüktem nung senden kaogo.
Sharmila-i ashiba agi, lokti merüktettsü maparenji kija nungi tenzüktsüla, ta ashi.
“Ozü party-i AFSPA agientsü aser election nung ochimashi atsüdoktsü atema inyaktsü,” ta laisa ashi.
PRJA-i election nung candidates 20 toktepdaktsütsü akok, ta party Convener, Erendro Leichombam-i metetdaktsü.