Manipur nung Congress Party-i nangzükba ama meinyak: Vikheho

Kohima, March 02 (TYO): Brihostibarnü Nagaland Roads & Bridges Minister, Vikheho Swu-i, Manipur nung nüburtemi nübur meimba aser mangdang aliba sorkar tashi tait ka nüngdaker, ajisüaka tia makai Congress sorkari küm aika Manipur yimsü süaka parnoki nangzükba ama meinyaktet, ta aitsü.
Vikheho-i, Manipur nung tenemlen aliba tribe tem rongnung Ukhrul district nüburtem shisa takaba lir, ta ashi.
Tanü nikongdang Ukhrul nung NPF election nüboyim sentong ka nung jembidang Vikheho-i, “2012 küm tenemlen aliba nübur atema menden 20 nungi nenoki MLA 4 shimtet, aser Manipur Assembly-i tribals anema bill asem benokba anema parnoki MLA nungi anentsü atema telemtetba agi, koba ajanga Tiri bill temji agizüktsü aliba nokdang,” ta metetdaktsü.
Paisa, Chief Minister, Ibobi Singh leniba nung Congress sorkari Manipur nung tenemlen aliba tribes sendoka lemsatsüogo aser Meitis nunger kar dang ajangzüker, ta ashi.
“Ato kilonser, Narendra Modi-i Act East Policy sangdongba ajanga tarutsü nung North-East state tem ya India aser ASEAN linüktem tsüngda kikümbang ka akumtsü,” ta paisa metetdaktsü.
“Asen tetsü-tebou li, sobaliba aser yimyatsüya temjia, asen li aser nüburtem terenlok ama kasa tongtibang lir,” ta pai shisem.
Vikheho-i, “nenok melongjemtetra kibongtem nung asüama alitsü, kibongtem lemsatsü, nenok li lemsatsü aser sen aazüka alitsü temeten samatsü aser kenü anogobo semchisemnurtemi nü dang tasüngdangba alitsü, anungji melenshitsü atema mapang tajungtibaji tang mapang ya lir,” ta ashi.
Paisa nüburtem dang, “NPF nem vote agüjang, iba party-i Manipur nung tenemlen alirtem atema inyaktsü,” ta metetdaktsü.