Manipur nung Congress züngsem kati Independent candidate ama tokteptsü

Imphal, February 14 (Agencies): Kangpokpi nungi Nepali nunger candidate Khadga Bahadur Tamang Hombarnü Congress toktsür Independent candidate ka ama nomination file süogo. Phungzathang Tonsing-i Congress party toktsüba sülen Tamang ya tanabuba candidate asütsü.
“Ni Independent candidate ka ama tanü nomination file süogo,” ta Tamangi osangbenertem dang ashi. Manipur nung Naga nunger voter temi Congress masemba sülen pai Congress candidate ka ama election tokteptsü nungi atsünga Independent candidate ka ama tokteptsü shim. “Kangpokpi nungi election nung Congress candidate kata malitsü akok,” ta pai ashi.
Kangpokpi constituency nung Naga nunger voter tem aika lir. Okram Ibobi Singh-i aniba sorkari district tasen 7 akümba atema Naga nunger mepelar. Kangpokpi district yaa Naga nunger teimba aliba Senapati district nung Kuki nunger longsoaa aliba tesem nung aküm, anungji Tamang-i election nung Congress nungi metoktepnü.
Küm 45 tai Tamang pa mapa Congress nung kaketshir telok National Students’ Union of India (NSUI) nung lenir ka ama tenzük, iba sülen Manipur Gorkha Students’ Union nung tir ka ama inyak, maneni pa Kangpokpi nung Congress party nung tongtibang züngsem ka ama inyak. 2014 nung tang teinyakdak MLA Nemcha Kipgen Congress den atemba sülen pa BJP-i meyip.
BJP puri Tamang parnok candidate ama election-i yoktsü renemer liasü, saka Nemcha tanaben BJP-i meyipa aruba sülen pa BJP ticket angutsü asoshi kangabo teimla mali ta angateta tanaben Congress-i meyip.
Tamang asoshi pa lenmang nung tetsükdaktsü ajurubaji, Joint Committee on the Inner Line Permit System (JCILPS) purtemi par kibong 1951 masüdang Manipur-i aruba kuli meshi. JCILPS-i ashiba agi, candidate tem shirnok kibong 1951 sülen Manipuri aru, parnok election nung metoktepdaktsütsü ta sangdong.
Iba sülen pai JCILPS lenirtem ajurutepa par kibong 1937 küm Manipur-i aruba kuli kakettem bener oa sayu, ta osang ka ajanga ashi.
JCILPS purtemi pa election nung tokteptsü asoshi nokdangtsü molungtet nungbo iba ajanga Congress party asoshi tetsükdaktsü asütsü, anungji pai iba ajanga Congress tim medemdaktsüner, ta osang ajangasa shisem.
Manipur election shilem ana küma lemsar agitsü. – March 4 nü menden 38 atema aser March 8 nü menden 22 atema ta alitsü. Kangpokpi constituency mezüng shilem nung election agitsü. Iba constituency nung Kuki nunger aser Nepali nunger voter tem kasa shi dang lir, anungji Naga nunger voter temi takokji lemtettsütsü akok. 2012 election nung Tamang-i Nemcha Kipgen vote 247 agi makok.