Manipur nung Fast-track court ka amenokogo

Imphal, Rongchii 10 (Agencies): Manipur chief minister Nongthombam Biren Singh-i Tentonü Imphal West district, Cheirap Court Complex nung special court ka lapoktsüogo. Iba okadak ajanga temesepba mozü amshiba dak sendakba nung ken o tem obendangtsü.
Iba fast-track court ajanga temesepba mozü aser psychotropic substances dak sendakba ken o tem kara kara obendang agütsütsü.
Biren Singh-i ashiba agi, nüburtemi sorkar dang tetsürtem anema inyakba aser temesepba mozük dak sendakba nung ken o kara kara asadangtsü asoshi fast-track court balaka tentettsü atema khanga liasü.
Tetsürtem anema inyakba ken o balala asadangtsü asoshi fast-track court ta taoba küm Aami (June) 27 nü lapokogo. Chief Minister-i ashiba agi, state sorkar War Against Drugs campaign kübok state nung tesem aika nung poppy tsünüa aliba srokari taoba ita ishika tsüngda nung raksatsüyonga ogo.
Biren-isa ashiba agi, poppy tsünüa aliba yimdaklirtem tem atema temelen agar (sandalwood) tsünüdaktsütsü asoshi benoktsü.
Paisa ashiba agi, state sorkari taoba küm North East Development Summit mapang nung bendanger firm ka den tezüngzüktepba ka yangluogo.
Biren Singh-i, Jiribam nung agar lakh 3 shi tsünüa aliba pa nem metetdaktsüog ta ashi. Lanurtem temesepba mozü achiba aser ozüng raksaba maparen balala nung shilem agiba tongtibangtiba kuliji School züngtur anenba ya lir. Iba dak sendakba nung state sorkari special scheme ka kübok school züngtur anener parnok 40,000 shi tanaben admission agiba nung teyari agütsütsü asoshi sentong lir, ta paisa shisem.