Manipur nung gari 22 rongtoktsü; curfew ozüng benokogo

Imphal, December 18, 2016: Manipur nung Naga nunger teloktemi rongsenkettsüng lenmang mokdangba anema longkak aitertemi Deobarnü Imphal nung gari rongtoktsüba noksa nung angur.

Imphal, December 18 (Agencies): Yashi Manipur nung Tenla ki ka amak ta olulu prokba sülen state yimtiba Imphal nung tensa raksaba ajanga mapang telatet ka makai curfew ozüng benokba den külemi olulu prokba nokdangtsü atema tesem aika nung mobile internet services anenja liaka Deobarnü Manipur, Imphal East district nung Naga nungeri rongsenkettsüng lenmang mokdangba anema longkak aitertemi bus densema gari tajemba agi 22 rongtoktsüogo.
Ajisüaka gari rongtoktsürtemi gari anirtem aser passenger tem dangbo kecha mashi. Fire brigade gari iba tesemji tonga moutetba ajanga garitemji tagitsü mali rongtok.
Iba tesem nung tear gas amshia longkak aitertem senshidaktsüba sülen police aser paramilitary sepaitemi timtem adokba tesemtem nükdar.
Rongsenkettsüng lenmang mokdangba atema nübur tejashi metetdakja activist A. Rajen-i, “Centre sorkari United Naga Council (UNC) tsülokdaktsüba aser telungpur teloki pusemba ajanga anogoshia tensa tamajungba akumer. November 1 nungi tenzüka Manipur anema rongsenkettsüng lenmang mokdangbaji Centre-i ola madoki repranger,” ta ashi.
Honibarnüsa tetsürtem,i ghonda 24 mokdanga aonung tembang, aser maneni parnoki longkak aittsü, ta shiogo.
Imphal West district kübok Sagolband tesem nung tetsürtemgari aika anendakja tribal tesemtemi belensba khu aika rongtoktsü.
Tetsür kati, “Market nung kecha mangur. Kinü tanur chiyungtsü, taküm kümzükba mozütem, anshi, ango, entsü ajak samaogo. Mokdnabngbaji anema onokia tribal tesem kar mokdanger, kechiyong onok timtemba ama parnok-a timtemtsüla,” ta ashi.
Deobar anepdang tribal teluingpurtemi Imphal-Ukhrul lenmang nung aliba Bongyang yim nung injang yok, saka yimtaklir aika Tenla kidang aliba ajanga shianga meyiru. Iba sülen Imphal East nung curfew benoka liasü.