Manipur nung gari lendong balala nung nisung 21 tsükset

Imphal, March 27 (Agencies) : Hombarnü Manipur nung gari lendong balala nung nisung 21 tashi asü aser 40 tema yiruba osang angazüker.
Gari lendong balala nung tasür kibong shia nem sen lakh 2 aser yirur nem sen meyirjang 50 teyari agütsütsü ta tanü State sorkari metetdaktsüogo.
Manipur Chief Minister N. Biren Singh-i tasürtem asoshi mang ayimba osang metetdaktsüogo aser sorkari takoksa ajurur kibongtem nem teyari agütsütsü aser yirua angati anepalutsü, ta ashi.
Hombarnep 3:30 ako meta Senapati district nung Imphal-i aoba bus gari ka lungren kati tsüoka ai. Iba lendong ya Highway No 2 nung atalok aser gariji metre 500 shi lenküboki ai.
Iba lendong nung nisung 12 tsükset aser parnok 25 tashi yirur mozüki nung anepaludar. Mozüki nungi osang ka ajanga ashiba agi, yirua alirtem rongnung karbo kanga mejungi lir.
Bus gariji Deobar nikongtsütsü Dimapur, Nagaland nungi Imphal-i apusoba liasü.
Chakumai nung apu ka nung lungku ka adendang bus gari anisangi gari mazüokteti aküm aser lungren nungji tsüok ta osang ajanga ashi.
Lendong atalokli Tadubi nung alirtemi yaritep aser iba sülen police aser Assam Rifles sepaitem tesem tonga orr yaritep.
Ano, Hombar anüngdang 12:20 ako meta Imphal-Jiribam National Highway-37 nung gari lendong ka atalokdang, tetsür ana dena nisung 8 tsükset.
Jiribam nungi Imphal-i aoba mini bus gariji lungren ka nung tsüok. Iba gari nung nisung 15 mena liasü aser parnok 6 yirur mozükidang anepaludar, ta osang ajanga ashi.
Ano, Senapati district nung tanep bus gari tsüokba tesem anasa aliba Maram nunga truck gari anir ka tsüksetba osang metetdaktsüogo.
Item tatalokba atema Manipur Angh, Najma Heptullah-ia mangyimba osang metetdaktsü.
Manipur nung Parliamentary secretary (Home) Y. Sushindro-i lendong atalokba tesem ajak semdanga liasü.