Manipur nung ghonda 38 mokdangtsü

Imphal, July 27 (Agencies): Manipur state nung July 8 nü Inner Line Permit (ILP) amshitsü tenzükang ta takhangba agütsüba mapang kaketshir ka taküm agirtem nem sorkari temerenshi magütsüba ajanga, Mongulbarnep 5:00 ako nungi tenzüka Manipur rangben nung ghonda 38 mokdangtsü sangdongogo.
Iba mokdangba ya tang telidak curfew ghonda 15 lapoktsütsü aliba den tenchiteptsü.
Aji oda süaka, ketdangsertemi ashiba agi, section 144 CrPC bosa alitsü aser iba mapang nisung pongu dak tema majurutepdaktsü mesüra mejajadaktsütsü aser nüburtem süng o lung amer mejajadaktsütsü.
Iba mokdangtsü ayonger, Joint Action Committee (JAC)-i ashiba agi, July 29 nikongdang 7:00 ako tashi iba temokdangba alitsü aser iba mapang nüburtemia takhangba ola yokang ta temepishiba agütsüogo.
JAC-i sangdong ka ajanga ashiba agi, Sapam Robinhood tepseter police ji merenshitsü melena amokbanger kümzüka ayur.
Drafting committee nung züngsem MLA N Biren-i state nung aliba nüburtem kümzüka ayutsü asoshi ita tsüngda nung bill tasen ka Manipur assembly nung benoktsü alibaji JAC-i aija shiogo, kechiba süra pai nangzükba ama kaketshir tepseter police dak kecha meinyaktet.
Parnoki MLA-baji anokdangtsü, ta kasa sangdong ajanga metetdaktsüogo.