Manipur nung Highway Protection Force tentettsü

Imphal, April 2 (Agencies) : Centre-i Manipur nung highway kümzüka ayutsü atema India Reserve Battalion (IRB) battalion 4 tentettsü mulunga agizükogo aser IRB sepaitemji Manipur nung gari lenmang tongti ana anüktsü asoshi mapa lemzüktsütsü, ta Manipur Chief Minister, N Biren-i ashi.
N Biren-i pa indang office nung transporters’ associations tanishirtem den ajurutepa senden amendang iba osang metetdaktsü aser paisa Nagaland aser Assam nungi chief minister tem den ajurutepa Nagaland adena Manipur-i aruba garitem mapang shia timtem ajuruba indang onük lemsateptsü ta shisem.
State ana nungi chief minister tem den sendenji Guwahati nung amentsü aser iba nung Union Home Minister Rajnath Singh-ia adentsü mulungogo, ta paisa metetdaktsü.
“Imphal-Dimapur lenmang nung Manipur indang garitem timtem melii senzütsü atema ni Rajnath lia Nagaland chief minister den tenangzüktep ka nung sign asütsü” ta N Biren-isa shisem.
Nagaland state nung Manipur garitem mapang shia timtem ajuruba indang onük Manipur nung transporters’ associations-i N Biren Singh den lemsatep.
Senden nung Chief Minister-isa transporters’ associations tanishirtem dang NH-2 nung ‘goods and passenger services’ ajak convoy matai senzütsüla kechiyong mokdangba kecha mali, ta metetdaktsü.
Highway tem nung IRB aser Manipur Rifles mapa lemzüktsütsü, ta paisa shisem.