Manipur nung ILP atema longkak tesashiba aiter

Imphal, May 31 (Agencies): Manipur nung Inner Line Permit (ILP) atema maneni longkak aita, 2015 küm August ita nung Manipur assembly nung ILP atema bill asem agizükba nung tangsa Tir telangzüba agütsütsüla, ta takhangba agüja longkak aitdar.
Longkak aitdang Mongolbarnü nisung trok yirusemba zünga ajak agibo nisung 21 tashi yiruogo.
Longkak aitertem state Chief Minister, Okram Ibobi Singh indang office-i aodang police-i parnok dak ajok agi azükba den külemi tenük aamtsü tango den tzü kahloktsü. Tesüiba anogo pezü tsüngda tajemba agi nisung 15 yirua liasü.
State sorkari June 2, 2016 tashi school, college aser shisaliok reju ajak shibangtsü sangdongogo.
Iba longkak aitba tayonger Joint Committee on Inner Line Permit System (JCILPS)-i June 1 nungi 3 nü tashi state aser central sorkar office ajak nung “public curfew” alitsü sangdongogo. Committee-isa Greater Imphal nung alir non-local ajak dang “public curfew” mapang pei kidang nungi ayazüka maotsü tekümdangtsü metetdaktsüogo.
June 2 nü Municipal election agitsü sentong lir. Item bill asem ajanga state nung tenemlen alir aser lendenlen alir tsüngda telemsa adokogo.
Lenden nung nung alirtemi item bill asem nung Tir telangzüba aginer saka tenemlen alib kintemibo item bill asemji ajanga parnok taküm aser maitsü amokmerener, ta bilemer.
Item bill agizükba anema longkak aitdang 2015 August ita nung police-i nisung teku kahset aser hill tribe temi tasümangtemji aremtsü memulungi tang tashi mozü kidang tasümang ayudak yua lir.