Manipur nung Indo-Myanmar arrtsülen Curfew ita 6 alitsü

Chandel, Oct. 15 : Manipur kübok Ukhrul aser Chandel district na nung India aser Myanmar na arrtsülen kilometer asemsemshi nung tang nungi ita trok aonung 6:00 ako nungi anepdang 4:00 tashi curfew alitsü ta Ukhrul District Magistrate-i metetdaktsüogo.
Ukhrul nung District Magistrate, Hrisheekesh Modak-i curfew alitsü ozüng agütsüba nung shia aliba agi, Myanmar tsütsülen nungi aonung telongpurtem senzüba osang angazükba ajanga curfew ya agütsütsüsa aküm.
India aser Myanmar arrtsülen aonung telongpurtem jajaba ajanga state nung yimjung mapang melitetter, iba jagi arrtsülen iba ama senzüsenpongba mapatemji nokdangtsüsa akümer ta kasa ozüng nungsa shia lir.
State Home Department-ia 144 CrPC kübok India aser Myanmar arrtsülen mapang tatazük ka tsüngda nisungtem mashimashi mejajatsü asoshi ozüng aagüja lir.
Assam Rifles mesüra India sepai tanishiba nungi temelaba magi lateta yutsüba mapang nungji India tsütsü artsülen shinga arem leni maotsü aser nisung shinga lenmang lendi nung senzütsüba dak alaka tanga lenmang nung mejajatsüla aser ano,India tsütsü Ukhrul district kübok nisung shinga India sepaitem dang temelaba mebeni prangpong bener aremleni maotsüla ta kasa ozüng nung shia lir.
India tsütsü artsü nungi kilometer 3 tashi tonga gari nung mesüra tetsüng agi asüyonga arrtsülen jagi maotsüla ta kasa ozüng nungsa metetdaktsüogo.
Iba ozüng ya October 12, 2015 nü sangdong aser ita trok tashibo alitsüsa akümtsü.