Manipur nung kaketshir ka asüba atema ghonda 24 mokdang

Imphal, July 24 (Agencies): Taoba hopta tetsür kaketshir ka soseta sür lia anguba atema Joint Action Committee (JAC) ka tentet aser parnoki Bodbarnü ghonda 24 atema Manipur state ajunga mokdangogo.
Thangmeiband Meisnam Leikai nung alir arishi küm 13 tain tanurji Standard Robarth Higher Secondary School nung la indang hostel taktang nung sür lia angu.
Iba school ya Imphal West kübok Canchipur nung lir.
Brihostibarnü hostel taktang nung tanutsülaji tekong nung süngzü agi alen, saka la tetsüng agi ali nung tangshia apudaker liasü.
Police-i iba dak sendakba nung ken o ka benokogo aser bushisüngdang tenzükogo saka tang tang nisung shinga pua marutet lir.
Mongulbarnü All Manipur Students’ Union (AMSU)-i anir yimdaklirtem aser kaketshirtemi Thangmeiband Road noktanger lungkak ait.
Lungkak aitba sayua tanutsülar kibongi pa indang mang memeshii lir aser tang tashi Regional Institute of Medical Sciences (RIIMS) nung yua lir.
Sorkari tanutsüla tepsetertem pua merenshitsüla aser iba amaji meinyakra lungkak aittsü ta AMSU president Peter Laishram-i ashi.
Külen, Manipur nung Maoist Communist Party (MCP)-i Hombar nungi tenzüka hopta ka atema Standard Robarth Higher Secondary School noktangogo.
Class VII kaketshir ka taitsü keta sür lia anguba atema parnoki iba tenokdangba agütsü.
MCP-i school nung kaketshirtem dena nisung ajaki ochi jembitsü atema sangdong ka nung metetdaktsü.
“Mapa shitak meinyakra, school mokdangba mapang atsülangtsü. Iba tatalokba ya CBI nem bushisüngdang südaktsütsüla” ta MCP-isa metetdaktsü.
Manipur chief minister N Biren Singh-i iba ken o ya magisterial inquiry committee nem la nem bushisüngdang südaktsütsü ta nangzükogo.
Iba school indang principal-i agütsüba bail bo agizükogo saka warden tem indang bail temepishiba magizük lir.