Manipur nung kaketshirtemi MPSC anema noktaker

Imphal, February 14 (Agencies): Manipur nung sorkar mapa 82 atema tanga state tem nungi candidate tem tenüng agütsüdaktsüba anema kaketshirtemi ‘selection test’ mokdangtsü aser Manipur Public Service Commission (MPSC) office shibangtsütsü, ta amokmerenogo.
“Shisaliok tsütsü tejaklen aliba state tem nungi candidate temi Manipur nung sorkar mapa 82 tatidang nung takok angutsü” ta Joint Students’ Coordination Committee (JSCC) convener, Jayanta Khuman-i ashi.
Manipur Public Service Commission-i state sorkar mapa 82 atema online applications meshi aser iba asoshi written test ji February 28, 2016 nü agitsü sentong lir.
Honibarnü lungkak aiter kaketshirtemi Education Minister, Moirangthem Okendra den ajurutep aser iba onük nung pai mapa kar inyakang ta teyari meshi.
Minister Okendra-i kaketshirtem dang pai iba onük angadangtsü aser nüngdakba mapa inyaktsü ta nangzük.
“Application 35,000 agüja aliba nungi candidate 17,000 ji tanga state tem nungi lir. Tanga northeast state tem ama Manipur nungbo local candidates atema maongka kecha mali” ta Khuman-isa metetdaktsü.
Nagaland nung local candidates atema mapa noklang nung shilem 80 mekazüktsür. Mizoram nung candidate kati Mizo oshi angatettsüla ta telatetbatem lir. Ajisüaka, Manipur nungbo item ama telemtetba kecha agia mali, ta paisa shisem.
Manipur adena orr aliba candidate temi local oshi zülutsü mesüra jembitsü makoktsü aser iba jagi ketdangsübaren nung tongtepratepdang timtem ajurutsü. Iba khuret ajanga state sorkari Centre sorkartem peladaktsütsü atema mapa inyakba kuli sayur, ta Ramananda ta ser candidate katia osangbener dang ashi.
Mizoram nung non-local candidate temi tenüng agütsütsü akok, saka parnok indang tenüngji voters’ lists nung alitsüla. Ibaji parnok tasoba certificates ajanga kuli agütsütsüla, ta Khuman-isa shisem.
Northeast state timba kati local candidates aginüdang kechiba Manipur Public Service Commission-ibo telemtetba takang magi, ta paisa ashi.
Manipur nung zünger mapa mangur nisung 750,000 den timba lir aser parnok tenüngtemji employment exchanges nung züluoka lir.
Manipur nung nütsüng yongsükji lakh 27 den tajemba lir. State tulutem nungi arurtem den parnoki metokteptettsü ta bilemba agi local candidates-i MPSC inyakyim anema ‘joint action committee’ ka tenteogo.
February 18, 2016 tashi nung MPSC-i yimjak nung osang kecha mesangoktsüra, onoki mapa inyaktsü aser written test mokdangtsü, ta kaketshir kati ashi.