Manipur nung Khristan teloki Deobarnü polling masütsü akhanger

Imphal, February 4, 2022 (Agencies): Manipur nung Khristan telok kati Deobarnü assembly election agitsüba aliba anogo melenshitsü takhangba agütsür.

“Khristan nungeri pei tamang amangtettsüba temeten nung ajemdaker February 27 (Deobar) nung polling agitsü aliba anogo melenshitsü mepishir. Ibaji meinyakra onoki okadak ken o benoktsü” ta All Manipur Christian Organisation (AMCO)-i metetdaktsü.

“January 17 nü onoki Election Commission of India (ECI) dangi Deobarnü polling magitsü atema shidi züluogo kechiyong Deobar ya Khristantem sarasademba anogo ka lir” ta AMCO president Rev S Prim Vaiphei-i ashi.

Tanü tashi nungi ECI nungi telangzüba kecha mali anungji tanü Christian Action Committee senden nung iba takhangba agütsüshitsü lemtet. Anungji Election Commission-i teinyaktsü inyaker tekaratiba nung osang tajung sangoktsütsüla, ta paisa ashi.

“Covid wara mezüngbuba aser tanabuba nung Khristantemi tekülem sentep magii amalitepa yaritepogo” ta Rev Prim Vaiphei-isa ashi.

State sorkar aser ketdangsürtemi tamangba yimsü indang angatettsüla aser Deobar mesüi tanga anogo ka nung polling asütsüla, ta paisa shisem.

Election Commission of India (ECI) telok kati February 7 nü Manipur semdangtsü ta Hokolbarnü Manipur Chief Electoral Officer (CEO) Rajesh Agrawal-i ashi.

12 buba Manipur Legislative Assembly indang maparen inyakba reprangdangtsü atema ECI telok ka arutsü ta CEO-i ashi.

Iba mapang Election Commission-i Chief Secretary, Director General of Police, Chief Electoral Officer, State Police Nodal Officer, DG Assam Rifles, recognized National/State political parties, District Election Officers, Superintendents of Police aser Enforcement Agencies den senden amentsü, ta Rajesh Agrawal-isa ashi.