Manipur nung Kuki nunger 3 khaset; Tantsür ka tenla kidang sarasadema lia khaset

Guwahati, June 9, 2023 (Agencies): Manipur nung Hokolbarnep telungpurtemi Army süoshi agir oa nisung asem khaset.

Iba lendong ya Hokolbarnep 4:00 ako meta Khoken yimtsüng nung atalok. Iba yimtsüng ya Kuki nunger teimba ser aliba Kangpokpi district aser Meitei nunger teimba ser aliba Imphal East district na arrtsü nung lir.

Iba lendong nung Jangpao Touthang, Khaimang Guite aser Domkhohoi nunger khaset aser Thongneh o Thangkhojang na yirua lir ta osang angazüker.

Army indang combing operation inyaktsü atema aru asütsü akok ta yimdaklirtemi bilem saka telungurtem jagi parnok dak injang khaloktsü ta Indigenous Tribal Leaders’ Forum (ITLF)-i sangdong ka nung metetdaktsü.

Iba mapang Domkhohoi ya tenla kidang anepdang züngia sarasadema liasü saka telungpurtemi tekülem ki hao ta mali khaset, ta ITLF-isa ashi.

“Telungpurtemi Army uniforms aser garitem ya kong nungi angur ta tebilemtsü tulu abener aser iba nung temaba tashi kari yaritepba ajiteter” ta parnokisa metetdaktsü.

“Union Minister of Home Amit Shah-i anogo 15 nü yimjung nung alitsü ayongzükaka Arambai Tenggol aser Meitei Leepun amala Meitei nunger teloktem aser Meitei nunger asoshi bilemtsüba state sorkari hao ta melii ozüng alema inyaksangshir. Ibala inyakyim ajanga Union Minister-i yimjung alitsü ayimoktsüba mezüngmeshiba sayur” ta ITLF-isa ashi.

“Iba ama mapang tamajung nung onoki Khoken nunger den külemi noktaker. Lokti ka ama onoki nüngdakba mapa inyaktsü aser Meitei nungeri Kuki-Zo nübortem samatsütsü merangba noktangtsü atema taküm bendanga agütsütsü” ta ITLF-isa metetdaktsüogo.

Committee on Tribals Unity (COTU)-ia Union Home Minister Amit Shah dangi Khoken yimtsüng nung atalokba lendong indang shidi ka züluogo.

“Kuki nungeri yimjung bener arutsü ta teimla tulu nung combing operation pusema nungit saka iba teimla samaogo aser takoksa tulu bentsür aruogo” ta COTU-i shidi nung shia lir.

Meitei nunger telungpurtemi arishi küm 75 tain Domkhohoi Haokip ya tenla kidang sarasademya lia khaset. La indang kinungbo ya Ex-Serviceman ka liasü ta yimdaklirtemi ashi.

Sepaitemi combing operation inyaktsü atema aru asütsü akok ta yimdaklirtemi bilem saka telungpurtemi parnok dak injang khaloktsü.

Idangji iba yimtsüng anasa Gurkha Rifles liasü aser parnok tesem tonga arur telungpur den khatep. Sepaitem mapang shitak nung aruba ajanga azütokshi aika ajurutsü aliba nungi kümzük ta yimdaklirtemisa ashi.