Manipur nung Kuki nungertem kuremba anogo amongtsü

Imphal, Sept 11 (Agencies): 1993 küm Manipur nung Naga nunger o Kuki nunger na tsüngda tsükchitepba mapang National Socialist Council of Nagalim (Isak-Muivah) teloki Kuki nunger 900 shi tepsetba anogo bilemteta Mongolbar nü Manipur nung Kuki nunger ajak kurema amongtsü ta Kuki Impi Manipur-i metetdaktsü.
Iba anogomong sentong ajanga timtem lendong mataloktsüsa tang yongi sepaitemi Kuki nunger longsua aliba tesem ajaklen kanga junga anük tenzükogo.
Talisa Kuki nunger o Naga nunger na meyoktepa aliba tesem nung Police station aser paramilitary alidak tesem ajak nung kanga junga mita alitsü asoshi osang agütsüogo aser tesem ajaklen mita jajadagi ta mitkartem osang ajanga metetdaktsü.
Iba anogomong nung Kuki nungertem alidak tenla kidang adenshia sarasadem mapang agitsü aser iba ama nisung tepsetba mapa anema jajatsü asoshi Kuki Impi Manipur (KIM) aser Kuki Students’ Organisation (KSO) nati ayongzüka lir.
KSO tongti zülur S Haokipi ashiba agi, “Iba ama kin ajak samatsütsü merangba sentong nung asürtem bilemteta Kuki nunger kibong ajak nung sarasadem mapang agitsü aser iba dakji alaka tetsür tebur ajak mangyimba süoshi agir yimdong süa jajatsü”.
KIM teloki iba ama lendong mapang taküm samartem asoshi ochiobendang asoshi takhangba agüja mapang talangka inyaka arur aser parnoki tanga India government o NSCN-IM telok na tsüngda tangatettep kati marudang iba ken o ya tama tembangtsüla, ta takhangba agüja lir.
Iba mapang NSCN-IM teloki 1993 küm September 15 nungi Kuki nunger ajak Naga nunger li toktsür oang ta ozüng agütsü. Ajisüaka, parnoki agütsüba anogo matongdangyongi September 13 nü Kuki nunger yim ana  Joupi aser Janglomphai na rongdoktsü aser iba mi lendong nungi jena alidang Kuki nunger parnok 87 tepset ta KIM telokisa aija metetdaktsü.
Tang tashi Kuki nunger ajak samatsütsü sentong ajanga nisung 900 tepsetba asoshi ochi obendang kecha ngua mali ta KIM telokisa metetdaktsü.
1992 aser 1993 küm Manipur nung Kuki nunger o Naga nunger na azü tokshia tsükchitepba mapang anatsülen nisung aika samaogo.