Manipur nung linük ana den kiralongratsü tasa atonger ka apu: NIA

New Delhi, September 30, 2023 (Agencies): Manipur kübok Churachandpur district nung kiralongraba mapa inyaker ta temulung melemi bilemba nisung ka National Investigation Agency (NIA)-i puogo.

Iba nisungi Bangladesh aser Myanmar nung kiralongrar lennirtem den tasa atong ta NIA-isa ashi. Iba nisung dang asüngdangya asütsü atema Delhi-i anir ogo aser maneni bushisüngdangtsü ta parnokisa ashi.

Pai Myanmar aser Bangladesh nung pa den yaritepertem den külemi Manipur nung mapa tamajung inyaktsü tasa yanglur liasü ta NIA-isa ashi.

“Kiralongraba mapa inyaker ta tai tongloka alisang Seiminlun Gangte-i Myanmar aser Bangladesh nung kiralongraba telok lennirtem den Manipur nung mapa tamajung inyaka India anema rara menatsü tasa atong” ta NIA-i metetdaktsüogo,

June 22 nü Manipur kübok Kwakta nung bomb agi gari poksatsüdang nisung ka tepsetba ken o nung tongti süa tai tonglokja alisangji Gangte lir. Iba anogo apu tila ka anasa anena ayuba Scorpio SUV gari ka apokba sülen tensa tamajungba aküm. Iba ya kiralongrar mongin kar ajanga inyakba mapa liasü.

Ajisüaka, NIA-i Gangte ya koba telok nung züngsem’ar memetetdaktsü.

Kuki telungpur telok 25 shi kati Centre, state sorkar aser mitkartem den trilateral suspension of operations (SoO) nung sign sütepa lir. Iba SoO ajanga telungpurtem pei pei designated camps nung dang alitsü aser monitored storages nung prangpong-injang ayutsü lateta lir.

Ajisüaka, Manipur mepetmesü nung SoO agreement nung sign süa alir telok kari shilem agir ta ken o kar adoka lir.

“Myanmar aser Bangladesh nung amenoka aliba telungpur telok kari India nung telungpur lennir kar den ozüng alema mapa inyaktsü tasa atongba bushitetogo. Parnoki kin balala tsüngda mangatettep adokdaktsütsü aser India sorkar anema rara menatsü tasa atongogo” ta NIA-i tanü metetdaktsüogo.

“Iba mapa atema telungpur lennirtemi prangpong-injang aser tanga osettem alitsü atema senotsü teyari agütsüogo” ta parnokisa ashi.

Tesüiba anogo 9 tsüngda Manipur nung kiralongrar ana puogo aser Gangte ya tanabuba lir. September 22 nü NIA-isa kiralongraba ken o ka dak sendakba nung Moirangthem Anand Singh apu.