Manipur nung maneni Congress sorkar arutsü: Congress

Guwahati, Jan. 05 (Agencies): Nov. 1 nungi tenzüka tanü tashi United Naga Council (UNC)-i Manipur nung National Highway ana tashi nokdangba ajanga nüburtem timtemaka, taruba election sülen maneni Manipur nung Congress sorkar arutsü temolung lemteta lir, ta Congress sangdong ka nung ashi.
Northeast state 8 nung aliba PCC Tir tem den Brehostibarnü Guwahati nung ajurua senden amenba sülen Congress lenir CP Joshi-i osangbener den jembidang ashiba agi, “Manipur nung aliba nüburtemi BJP magizüktsü, kechiyong tang lenmang mokdangba sentong ya shirnok ajanga inyakdaktsür, ibaji nüburtemi meteta lir, aser nüburtem anema ‘demonetisation’ sentong tenzükba ajanga parnoki taruba election nung parnok tamakok alutsü.”
Manipur nung 2002 nungi Congress teloki yimsü süa arur aser March 4 aser 8 nung election agitsü lir.
Demonetisation anema nüburtemi nokdaktsü asoshi aser Rashtriya Swayamsevak Sangh (RSS) teloki nüburtem sobaliba samatsütsü asalentong atongba atema iba senden nung tongtibangsüa jembi aser Manipur election atema jembia liasü.
Meimchir temeten asoshi rarar Irom Sharmila-i tenzükba, People’s Resurgence and Justice Alliance (PRJA) telok, Congress-i tsüboa maliba olen ka pai shisem. Taruba election nung PRJA teloki menden 20 nungi tokteptsü. Sharmila-i menden ana nungi tokteptsü aser menden ka nungibo Chief Minister Okram Ibobi Singh den tokteptsü sangdongogo.
“Congress-i PRJA teloka metsübur. Ajak atema yimtenren nung maongka lir,” ta Joshi ajanga ashi. UNC ajanga Naga nunger lokti lenirtem January 7 nung ajurua lenmang mokdangba ya maneni akatsü asü anentsü, iba indang jembitsü lir. BJP telok densema Nagaland nung sorkar tenteta lir, aser item teloki Manipur nung aliba Naga nunger anizüka aotsü asalentong yanglur ta nüburtemi temolung melemteter. BJP teloki asameyanga Congress madak takok angutsü mechi taoba küm “North East Democratic Alliance”(NEDA) tenteta liasü.
Congress teloki NEDA masü saka RSS telok atema tebilemtsü akar, ta taoba Assam Chief Minister Tarun Gogoi ajanga shisem. “NEDA telok ya Northeast Congress Coordination Committee telok ama teintet telok masü. Asenok atema tebilemtsü tuluba ji RSS telok ya lir, kechiyong parnoki Northeast nung Hindutva yimsü amshia asen sobaliba aser akhi otsü raksatsünür,” ta pai shia liasü.